S’hè spentu u 18 di marzu Ghjuvan’Paulu Bastiani à l’età di 67 anni, è una sciappa di tristezza s’hè sparsa in tutta a cità è aldilà. Era militente naziunalistu ingagiatu è fidu. Zitellu di Bastia, omu di prima trinca, arradicatu in i valori di a Corsica, appassiunatu di a so terra è la so ghjente, generosu è spùticu, era firmatu spendifocu ind’è l’ànima. Avìa cumandatu a caserna in Bastia è tutta a curpurazione li hà resu un umagiu cummuvente.
A so sparizione subitània lascia i soi è mondu ghjente in Bastia prufundamente adduluriti. Arritti manda e so cunduleanze afflitte è fraterne à tutti i soi, moglie figlioli, figliulini, fratellu, surella, nipoti, parenti è amichi.
Hà ritruvatu i so parenti è a so figliuluccia cara Ghjuvanna Maria troppu prestu sparita. Riposi in pace o Ghjuvan’Pà. •
