Global Earth Keeper, vale à dì I guardiani mundiali di a terra, hè un ONG indipendente di tutte stituzioni, putere pulìticu o ecunòmicu. Hà per scopu di rinfurzà e lege internaziunale nant’à a prutezzione di l’animali è di l’ambiente. S’impegna à u livellu internaziunale, in Francia, è in Corsica dinù !
In fatti, hè statu creatu da Laurence Constantin, chì stà in Corsica ! Laurence hè cofundatrice in u 1982 di Global Earth Keeper Collective Society International et France cù una manata d’amichi militenti antispezzisti, da fà « rispettà è appiecà e lege internaziunale nant’à u sviluppu durèvule, a Càrtula mundiale pè a Natura di u 28 d’ottobre 1982, è a Cunvenzione di a Biodiversità biològica di Rio in u 1992 ».
Global Earth Keeper si rivendicheghja dunque cum’un associu antispezzistu, una dimarchja nata ind’è l’annate 70, per dì chì l’omu è l’animalu sò pari. L’antispezzisti bràmanu a liberazione di l’animali, è sò contr’à tutte l’oppressioni chì i marturièghjanu : allevu industriale, zoo, parchi marini, cìrculi, corridà, caccia, ricerca scientìfica, è ben intesa, sò contr’à a cunsummazione di carne. L’animale hè un èssere sensìbule, chì risente u dulore, a paura, a tristezza, è l’omu deve pensà à a so suffrenza è à u so benestà.
L’antispezzisti chjàmanu à a cuscenza è à a rivolta umana per ricuncilià l’omu cù a natura.
Stu raportu cù l’animali indita un raportu cù l’ambiente : scumbàttenu contr’à a destruzzioni di l’abitati, a spluttazione di a biodiversità, tuttu ciò chì porta à disturbà l’animali in i so spàzii di vita, da l’insetti à i mammiferi.
« Ùn mi sentu micca u drittu di svià u mo sguardu di a suffrenza animale. Per mè hè sempre stata un evidenza di scumbatte a viulenza, a discriminazione è a crudeltà fatta contr’à l’animali è contr’à l’ambiente » spieca Laurence Constantin, presidente di Global Earth Keeper France dapoi quasi sett’anni. L’associu s’imprimureghja dinù di a salute di u mare. Urganizeghja spessu operate per pulisce e spiagge, i fiumi, i porti. Lotta contr’à a pesca industriale, spessu à pesca à a balena è manifesteghja assai in stu mumentu pè a liberazione di u capitanu Paul Watson imprigiunatu di manera in-ghjusta dapoi sei mesi in u Gruenland à u Danemark à a dumanda di u Giappone chì vole a so estradizione. Cum’è skipper, Laurence Constantin hà navigatu nant’à quasi tutti i mari di a pianetta.
Global Earth Keeper s’impegna assai dinù pè a salvezza di l’animali minacciati di sparizione, cum’è l’elefanti. L’associu sustene di manera attiva u Parcu naziunale di Waza à u Cameroun, cù u purtivechjacciu Dumènicu Milanini, rispunsèvule è cuurdinatore di st’operazione. « 20.000 elefanti sò tumbati ogni annu, a pupulazione era di 3 millioni d’individui in u 1960, hè cascata à 1 millione in u 1970, è à 400.000 oghje. A Caccia illegale si face à livelli industriali cù bande criminale urganizate o gruppi terruristi » dinunzia l’associu ch’aiuta cusì l’ecoguardi à furmassi è à ottene arme è materiali per luttà contr’à ssi tràffichi contr’à l’elefanti è l’altri animali di u Parcu naziunale (leoni, giraffe..) U scopu hè d’impegnà dinù a pupulazione soprapiazza da ch’ella intrateni, prutegi è valurizeghji u parcu naziunale di Waza. GEK li permette un aiutu suciale cù impiechi qualificati.
GEK : torna un associu d’andatura nòbile chì face prò in Corsica è sporta una bella imàgine di a nostr’ìsula in u mondu ! •
Infurmazioni : www.globalearthkeeper.com
Facebook : GlobalEarthKeeperGroupeFrance
