20 anni ch’ella hè stata assassinata a ghjurnalista rùssia Anna Poltkovskaïa. Era un 7 d’ottobre di u 2006. Avia 48 anni. Dinnunziava a viulenza è a ripressione di u regime di Poutine. Digià in 2004, era stata vìttima d’una tentativa d’avvelinamentu. Malgratu minaccie, è pressioni, hà cuntinuatu à bramà a demucrazia in u so paese è à dinnunzià a guerra in Ucràinia, cù i perìculi ch’ella raprisenta per l’Ucràinia, ma dinù pè u pòpulu rùssiu è pè u mondu. A stòria disgraziosamente ci impara chì quelli chì alèrtanu a pàganu suvente di a so vita. Ùn ci scurdemu di Anna Politovskaïa.
300.000 tunnellate di gasoil rùssii, 500.000 altre tunnellate di nuvembre pò 1 millione sùbitu dopu, eccu ciò ch’ellu prevede l’accordu trà Trump è Poutine. Per Trump l’urgenza hè a calata di u prezzu di u gasoil per l’Americani. Puru, secondu l’esperti di l’energia, hè una quantità troppu dèbbule per cambià e cose per raportu à a dumanda à a pompa in Amèrica. Hè dunque un accordu simbòlicu chì vene piuttostu à ristabilisce a nuturietà di Poutine allora chì e spurtazioni rùssie sò sott’à sanzione dapoi l’invasione di l’Ucràinia. Si capisce chì Zelensky si sente traditu. Ma ci hè peghju. Trump vole fà piantà i bumbardamenti ucrainiani contr’à e raffinerie rùssie è dumanda à l’Ucràinia di scambià di presidente ! Vale à dì incuragisce e stirpere di Poutine. Dapoi u principiu d’ottobre sò più di centu civili ucràiniani chì sò stati tombi da i droni rùssii frà i quali decine di zitelli. È dì chì Trump rivendicava u Nobel di a pace…
66,13 %, hè Raphaël Glucksmann chì serà u candidatu di a manca à l’elezzione presidenziale. Vince largamente a primaria suciale demucràtica davant’à O.Faure (solu 14,46 %), S.Royale (7,62 %), E.Maurel (5,92 %), J.Guedj (5,83 %). 134.467 elettori èranu scritti, 120.587 si sò sprimati.
5.000 cuntinentali si stàllanu ogni annu in Corsica dapoi decine d’annate. Hè ciò chì spieca a crèscita di a demugrafia corsa… Pè u RN è u so cumbottu Battini, hè un postulatu burghese chè di dilla… Femu a Corsica in zerga li hà rispostu ind’un cumunicatu. « I Corsi pè a maiò parte è in a diversità di e so urìgine, e so cundizioni è e so cunvinzioni, fàcenu fronte à una crèscita demugràfica purtata da u solu soldu migratòriu francese, senza antecedente in Corsica è senza para in Auropa » dice u partitu autunumista. « Aldilà di a scursisazione di l’impiechi, di e prestazioni suciale, di l’accessu à a prupietà fundaria è immubiliare, à l’alloghji suciali, à u rinculu di a nostra lingua è di a nostra cultura, avemu cullettivamente un gran’penseru di diventà minuritarii nant’à a nostra terra è di vede rinculà, sin’à sparisce, l’elementi custitutivi di a nostra identità di pòpulu » dice Femu a Corsica. « Fàllanu e màschere, u prugettu di u RN hè quellu di l’assimilazione di a Corsica è di u so pòpulu à l’inseme francese. A cusì detta “priurità regiunale” hè una larga operazione d’infumatichera »… È Femu a Corsica di cunclude : « Per contu nostru, cuntinuaremu u cumbattu pè a difesa, a salvezza è u sviluppu di a nostra identità, di a nostra lingua è di a nostra cultura. Cuntinuaremu u cumbattu pà a ricunniscenza di u nostru pòpulu è l’emancipazioni di u nostru paese, a Corsica Nazione ! » •
