800.000 personi piazza di a Concorde in Parigi stu 26 di sittembre, pè a messa in pien’aria di u Papa Leone XIV. 700.000 torna per salutalu nant’à i Champs Elysées. 80.000 giòvani intusiasti accolti à u Stadiu di Francia. 300.000 altre personi a matina di fronte à ND di Parigi è per sciaccamanà u passagiu di a pappamobile. 200.000 a sera in Lourdes. Pò torna 150.000 u lindumane pè a messa à u santuariu. Quasi 40.000 in Metz… a venuta di Leone XIV hà adunitu quasi 2 millioni di personi in i sfarenti lochi è rapurtatu parechje centinaie di millioni di ricette secondu à u guvernu, pè u più alberghi, risturanti, cumerci. E spese elle sò nulle pè a Francia. Ghjè a ghjesgia è i doni ch’anu pacatu u viaghju per una spesa stimata à 27 millioni d’àuri.
U più strasurdinariu ghjè l’urganisazione senza azzuffu, senza cumbugliu, in u calmu, u fervore è a gioia.
14 senatori RN sò stati eletti sta dumenicata in Francia. Hè a prima volta chì a strema dritta pò custituisce un gruppu à u Senatu. A dritta ella ferma magiuritaria. LFI entre in a Càmera alta cù u so primu senatore elettu in u Rhône.
278.484 suspissioni di froda à e finanze pùbliche in 2025 in Francia secondu à a cèlllula di rinsignamenti Tracfin. Sia, 32% di più chè in 2024. E frode à e finanze pùbliche raprisèntenu circa 3,2 milliardi d’àuri. Secondu à Bercy « a froda hà scambiatu di livellu », E scruccunerìe à l’aiuti pùblichi è à a fiscalità si sò « industrializate ». Sò di più in più ammaestrate da a criminalità urganizata chì si ghjove di prufessiunali per pullisce i so rivenuti pùzzichi. U travagliu di Tracfin hà permessu di ricuperà 40 millioni d’averi criminali, sia una crèscita di 40% in un annata.
27 ore è 29 minuti… hè a nova prudezza di u GR20 battuta da u savuianu Aurélien Dunand-Pallaz. Chjìbba ! A prudezza scorsa era di 29 ore è 46 minuti fatta da u nordista François d’Haene.
U GR20 hè 180 chilòmetri è sin’à 12 000 metri di slivellati, à colla è fala. Abitualmente ci vole, marchjendu, trà 12 à 16 ghjorni… per dì !
1769, un 25 di sittembre… cinque Naziunali sò accusati di cumplottu contr’à a Francia pocu dopu à a disfatta di Ponte Novu. Arrestati in Oletta, cundannatu à u suppliziu di a rota durante una parudia di prucessu, sò impiccati è privati di sepultura. A so salma hè sposta à a vista di tutti piazza di u Cunventu da ch’omu ùn provi à fà listessu. Frà quessi, Don Petru Leccia, fidanzatu à Maria Gentile. Avia 23 anni. Maria Gentile, 21 anni, sfidò l’armata francese per staccà u so caru è purtalu in terra. Cù amichi ghjunghje cusì à dà una sepultura cristiana à ssi disgraziati.
Sò i marturiati d’Oletta. Hè a nostra stòria. •
