172 spèzie d’ape salvàtiche in Auropa sò minacciate di sparizione. Hè u doppiu per raportu à 10 anni fà (77 spèzie in via di sparizione). Colpa à u saccheghju di i so lochi per via di l’occupazioni umane, ma dinù colpa à i pesticìdii, e malatie, u ciambuttamentu climàticu chì tòmbanu e so populazioni dapoi anni. Ùn s’agisce solu d’imprimurìscesi di a pruduzzione di mele : 75 % di e culture alimentàrie mundiale dipèndenu anch’elle d’un pullinisatore. L’àrburi à frutta o cù granette, cum’è meli, peri, chjarasgi, pruni, baracocchi, amànduli… ma dinù frutti cum’è fràvule, rubi, mori, murtelli… è legumi, pumate, mirizane, zucche, zucchini, colzà, girasole, caffè, avucati, eccèttera. I pullinisatori agìscenu ancu nant’à i legumi cum’è l’insalate, i spinacci, i càvuli, e carotte, e cipolle… Certe piante anu bisognu di i bufoni per solu scuzzulale è fà vulà l’amacu… per dì ! Dumane, cum’avemu da fà senza l’ape ?
47,9 millioni d’americani avianu già vutatu à a vigilia di l’elezzioni di mezumandatu à i Stati Uniti. Secondu l’osservatori era segnu d’una mubilisazione forte contr’à Trump. Stu 3 di nuvembre era u scrutinu officiale per elege 435 deputati à a Càmera di i raprisententi, 35 senatori (nant’à 100) è 36 guvernori. I primi risultati èranu aspettatu u 4 di nuvembre ma trà u votu per currispundenza è i scrutini disputati i risultati ufficiale piglieranu un pocu di tempu.
1 millione di manifestanti omancu in Italia (u guvernu ellu parla di 256.000 personi). Si còntanu manifestazioni in omancu 70 cità di u paese. E fottò di sse mubilisazioni nant’à e rete suciale sò impressiunante. 100.000 persona in Roma (10.000 secondu a pulizza), 100.000 in Milanu (30.000). 50 à 70.000 in Torino (30.000), 40.000 in Nàpoli (20 000), 60.000 in Bologna (30.000), pò torna decine di millaie in Gènova, Firenze, Livorno… dumàndanu l’aumentu di e paghe, a calata di i prezzi, a calata di u bugettu militare è l’aumentu di quellu cunsacratu à l’insignamentu è à e pulìtiche suciale, a rinuvazione di l’accasamenti sculari, l’aiuti à l’alloghju, è u drittu di manifestà…
500.000 manifestanti in tutta a Francia secondu l’urganizatori, 320.000 secondu a pulizza, u terzu mumentu forte stu sàbatu 31 d’ottobre ferma impurtante malgratu quasi dui mesi di manifestazioni, l’annunzii di u guvernu, e vacanze di nuvembre, i tràmpali messi à a mubilisazione, scambiendu i parcorsi autorizati à l’ùltimu mumentu o prununziendu interdizzioni di manifestà. I giòvani è u muvimentu di e magliette gialle dumàndanu sempre, parte liceana, un invistiscimentu di 10 milliardi d’àuri nant’à a renuvazioni di l’accasamenti sculari, u sciuglimentu senza aspettà di parcoursup, l’aumentu di e borse studiante è di l’aiutu per l’alloghji (APL), parte sindicale, l’aumentu di u SMIC per raportu à l’inflazione, l’aumentu di e paghe è di e ritirate, frà e quale e paghe di i funziunarii, l’aumentu di l’impòsiti pè i più grossi rivenuti, u rispettu di u drittu di manifestà, ecc.
U guvernu, ellu, aspettava a rientrata sta settimana per vede sè u muvimentu di prutestazione si mantene o nò.
800 Corsi omancu si sò piazzati sin’à in Firenze per partecipà à u cuncertu di Felì à u Teatru Nicolini. Senza cuntà quelli ghjunti d’un antra manera chì a formula pruposta è i taliani ghjunti à scopre cantà a Corsica. Una millaia di personi in tuttu anu fattu risunà à lingua corsa in core di a Tuscana ! •
