Ùn ci hè guerre senza atrocità. Ùn pòrtanu chè sangue è suffrenze sparghjendu malamorte. Ma l’omu pò circà di mustrassi sempre più crudele. È ghjè u casu in Ucràinia. St’ùltimi ghjorni, per svindicassi d’un pòpulu resistente chì difende a so libertà, e bombe rùssie sò fallate ind’è a nuttata di u 2 di nuvembre in una scola in Komychouvakha à cantu à Zaporijia. Agruttava un aiutu umanitariu induve a ghjente ci andava à chere di chè manghjà, curassi o arripusassi… Ùn ci ferma più chè un tamantu tufone, tuttu hè statu pulverizatu. Ci anu truvatu più di 30 morti è fèrmanu sempre una cinquantina di spariti. Solu cinque feriti sò stati cacciati da st’infernu, per dì a viulenza di u bumbardamentu ch’hè principiatu cù bombe nant’à u casamentu, pò parechje altre bombe lampate quandu i primi succorsi pruvàvanu à sorte i feriti… una stirpera. Certe salme ùn seranu mai più ritruvate.
In u stessu tempu, in Kharkiv, ghjè un uspidale ch’hè statu presu in mira, cumbinendu missili balistichi è missili antiaeriani sviati. U serviziu di cardiulugia hè statu cumplettamente struttu, è tutte e finestre sò state suffiate da l’onda d’impettu. Per dì a putenza di a splusione. Torna un tristu bilanciu cù omancu una settantina di feriti. È più di 200 malati da evacuà.
L’attacche contr’à l’Ucràinia stu 2 è 3 di nuvembre sò state cusì putente chì a Pologna hà fattu sapè avè messu e so forze aèree in alerta, da a paura d’esse tocca anch’ella.
Dapoi u principiu di a guerra. Più di 4.000 scole sò state tocche da i bumbardamenti rùssii. Una nant’à dui hè oghje in gattivu statu. Un millione di zitelli ùn ponu andà à a scola per via di a guerra secondu à l’Unicef, pàssanu a maiò parte di u so tempu ind’è l’agrotti anti-bumbardamenti, cù a paura in più di u freddu, a fame, acqua è elettricità regularmente tagliate. Tutte ste cundizioni di vita fàcenu chè i zitelli si stàllanu in un statu di stress crònicu dice torna l’Unicef, tucchendu a so salute mentale è pruvuchendu un ritardu sculare impurtante. Tutt’una giuventù sacrificata, è u s’avvene definitivamente cumprumessu.
Omancu 4.000 zitelli sò stati tombi o feriti in Ucràinia dice l’ONU, più di 20.000 sò stati depurtati in Russia contr’à a so vuluntà, 2.300 altri sò spariti.
Minendu senza arrestu a populazione ci hè una vuluntà di terrurizà è di mustrassi sempre più crudele. È dì chì Poutine pritendia scumbatte u fascìsimu è un statu ucrainianu terrurista ch’ellu ci vulia à dinazifià… È dì torna ch’ellu pratende chì l’Ucrainiani sò rùssii… Cumu capisce tandu di pigliàssine à u so pròpiu pòpulu ?
A Russia sanziunata da u mondu, inditata sin’à in e cumpetizioni spurtive, si ritrova oghje in riabilitazioni di fatti, e sanzioni ùn sò tutalmente appiecate, parechje federazioni spurtive (natazione, volley, hockey nant’à ghjaccia, escrime, alterofilia…) accètanu ormai l’atletti rùssii cù a so bandera, paesi cum’è à China, a Turchia, l’Emirati àrabi, e repùbliche asiàtiche cum’è u Khazakstan li permèttenu di mantene u so cumerciu, 1.300 bastimenti di paradisi fiscali traspòrtanu u so petroliu è u so gasu, vinduti à a China o à l’Ìndia. U presidente di i Stati Uniti l’alliscia, compra anch’ellu u so gazole, è accusa u presidente ucrainianu d’ùn vulè a pace… un veru stumacheghju d’ipocrisia. E sanzioni di l’Auropa contr’à ssi paesi ùn ghjùnghjenu à parà ss’aiutu à a Russia. È a maiò parte di e populazioni occidentale tròvanu ch’omu ne face troppu à favore di l’Ucràinia…
I zitelli ucrainia ponu cuntinuà a more. •
