Ci hè statu u mondu. Ci hè statu u fervore. Ci hè statu a gioia. Pò ci sò stati i messagi. A venuta di Papa Leone in Francia ferma un mumentone. Ùn si parla quì solu di religione chì cuncernerebbe solu i cattòlichi. Si parla d’andatura umana. Un papa s’indirizza sempre à l’Umanità, è frà ella, à u paese ch’ellu visiteghja. À l’ascolta di ciò chì si passa in Francia, Leone hà fattu passà i soi i messagi di manera ferma, è ancu ripetuta.
A Francia vene d’aduprà una lege nant’à u sustegnu medicale à morre. Ùn stunnerà à nimu chì a religione cattòlica è u so primu raprisentente fia sente a so voce nant’à u perìculu di derive ch’ella raprisenta è l’offesa à u fundimentu di u messagiu di vita ch’ella prona a ghjesgia. Hè cusì ch’ellu hà martellatu Leone chì a prutezzione di u drittu à a vita custitueghja u fundimentu incunturnèvule di tutti l’altri dritti umani. Dinunziendu in u stessu tempu e manipulazioni genètiche è u ricorsu à a gestazione per l’altru (GPA), hà avertitu nant’à u rìsicu di vede a medicina è e tecnulugie sviate in intraprese lucrativa à u pregiudiziu di l’ètica. « Hè impussìbule di cunsiderà cum’è nurmale di dà a morte. Ciò ch’hè legale ùn hè micca nicessariamente murale » hà dettu u papa. Esaltà u preziosu di a vita hè a basa di a religione cattòlica, senza caccià a cumpreensione è u sustegnu di fronte à e suffrenze di quellu chì dumanda à more. Per risponde à ssa dumanda, u Papa hà ludatu una sulidarità attiva, i curamenti palliattivi, l’accumpagnamentu è u sullevu medicale.
Altru messagiu fundimentale, a pace. À longu à e so sfarente prèdiche, Leone hà martellatu u bisognu di pace in u mondu è di cumbatte tuttu ciò chì cunduce à i cunflitti. Hà dinunziatu a spirale di a bugia è di u disprezzu di a parulla data. Hà dinunziatu e stirpere à e porte di l’Auropa, è u fattu di ghjòvesi di u nome di Diu per ghjustificà a viulenza è u crìmine. Hà chjamatu à a difesa di a dignità umana, di u migrante, di i pòveri. Hà chjamatu à a cuncordia fraterna è à u sustegnu di i più dèbbuli. Hà alarmatu nant’à e derive di l’intelligenza artificiale chì scappa à u cuntrolu di l’omu, alertendu nant’à a tentazione d’un mondu, paradisu di mascine, nemicu di u spìritu umanu. Hà chjamatu à un quadru mundiale per guarantisce chì u sviluppu tècnicu fermi à u serviziu di a dignità di a persona umana, da prutege pè u più i zitelli è i giòvani di sse derive, priservendu a so libertà di pensà da per elli. Hà cunfirmatu a so vuluntà di mette fine à a muca di l’abusi sessuali. Purghjendu ascolta à e vìttime, hà uffertu più chè a cumpassione di a ghjesgia, un drittu à a ghjustizia, ricunniscendu u bisognu di cumbatte sse viulenze à u senu di l’istituzione in una dimarchja cuntìnua di verità, di ghjustizia è di riparazione individuale. Hà parlatu torna di « a ghjusta laicità » ch’ùn pò cunsiste à sclude a religione di u spàziu pùblicu o di l’educazione. Impedisce a spressione religiosa in a sucietà, hè un stràviu di u principiu di laicità. A religione ùn hè minaccia pè a Repùblica, dice u papa, ma risorza ètica è educativa per nutrisce u bè cumunu. Leone brama una laicità di diàlogu è di cuuperazione, dicendu chì circà à sguassà Diu di a marchja di u prugressu cundannerebbe l’umanità à una disumanisazione tècnica.
Hà chjamatu torna tutte e religioni à unisce e so forze à u serviziu di u bè cumunu. U diàlogu, dice torna Leone, hè urgente è deve facci riesce u campà inseme.
Infine chì, papa Leone hà inditatu u sensu di u spìritu è di a dignata umana da ricercà per rende umanìsimu à l’umanità. •
