A Sentinella hè un associu di difesa di l’ambiente creatu in u 2008 dopu à a decisione di u Statu è EDF d’impiantà nant’à a cumuna di Bastilicaccia una centrala termica à u fiulu pisìu, vale à dì u più gattivu cumbustìbule fussilu, peghju chè u carbone. Un impiantu à 300 metri di a scola, è per una parte nant’à un spàziu agrìculu.
Cusì, dapoi sèdeci anni, A Sentinella scumbatte contr’à EDF è u fiulu pùzzicu sempre utilizatu à u Vaziu, « hè u più peghju in tèrmine d’emissioni di microparticule nanumetrichi cancarogeni, mettalli pisìi, ossidi d’azotu (NOx), diossidu di sòlfanu (SO2), cumposti urgànichi vulatili (COV), ecc… » spieca l’associu.
Cù uni pochi d’altri associ di difesa di l’ambiente, cum’è Aria Linda, U Levante, Le Garde è i muvimenti naziunalisti, A Sentinella vole fà chjode u Vaziu è prumove l’energìe rinuvelèvule per l’alimentazione energètica di a Corsica.
In 2011, si parla di a pussìbule appiccicatura di a Corsica à u gazoduc Galsi (trà Algerìa, Sardegna, Italia), allora chì u Statu dicìa in 2009 chì quelli chì parlàvanu di gaz ùn èranu chè « sunnioni »… U prugettu Galsi ci hà occupatu assai, mà oghje ùn si ne parla più. U cuntestu internaziunale di e guerre è u prezzu di u gaz l’hà fattu piantà definitivamente. A Sentinella hà postu lagnanza in ghjustizia cù Aria Linda in u 2013 è l’aiutu di u cabinetu d’avucati Huglo-Lepage per fà piantà u prugettu d’usina in Bastilicaccia.
In u frà tempu, in Lucciana, l’associ, i naziunalisti è u cullettivu di i residenti di a Marana ottènenu a fine di u fiulu pisìu, rimpiazzatu da u fiulu dettu legeru (gas-oil), menu gattivu, ma sempre pulluante.
A dumanda tandu hè chì e centrale sìanu alimentate à u gaz naturale lìquidu (GNL). In 2015, a Prugrammazione Pluriannuale di l’Energìa hè aduprata da l’Assemblea di Corsica chì brama l’autunumìa energètica à l’urizonte 2030, cù l’energìe pulite di a Corsica, vale à dì acqua, ventu, sole… è per ghjunghje sin’à ss’autunumìa, a PPI scummette una transizione à u gaz cù metanieri per alimentà e centrale in Corsica… Deci dopu, ùn ci simu ancu…
« Tuttu hè statu fattu da u guvernu Macron è i so ministri di l’ambiente successivi per bluccà a catena gaziera in Corsica »dinunziava qualchi annu fà A Sentinella, « a gattiva vuluntà pulìtica hè flagrante è omu si dumanda sè a nova centrala di u Vaziu nascerà da quì à 2023 »…
2023 hè passatu… ùn ci hè ancu. Ma a prima petra di a nova centrala di u Ricantu hè stata posta quist’annu è serà alimentata cù biocarburante… pulluante anch’ellu cum’è u gaz-oil…
A Sentinella s’impegna dinù contr’à a pulluzione di i batteli in u golfu d’Aiacciu, « 16 à 64 volte di più alta chì a norma sanitaria ». Hè membru di u Cullettivu Terra ch’adunisce parechji altri associ per scumbatte contr’à sta pulluzione impurtante. S’impegna torna contr’à u pianu di trattamentu di i lozzi à u senu di u cullettivu Corsica Pulita chì dinunzia u fattu di brusgià i lozzi. S’impegna dinù contr’à l’attache fatte à e règule d’urbanìsimu.
Infine chì, A Sentinella si face « sintinella » contr’à tuttu ciò ch’impuzzichisce u nostru ambiente. Bravu ! •
Infurmazioni : www.asentinella-2a.fr
Facebook : asentinella
