Dopu à l’Assemblea naziunale, a lege Duplomb hè stata aduprata da u Senatu l’8 di lugliu, è ghjè un rinculu scandalosu nant’à l’interdizzione di i prudutti fittosanitarii senza puru risponde à l’attesa di u mondu agrìculu chì brama una rivalurisazione di u mistieru è di e pruduzzioni agrìcule. Ssi prudutti cuntènenu neonicotinoidi tòssichi contr’à l’insetti è pè u più l’insetti pollinisatori, ch’anu un rolu impurtantìssimu pè a salute, pè a natura… è per l’agricultura !
I pesticidìi si ritròvanu dapertuttu, ind’è a terra, ind’è l’acqua di u nostru rubinettu (un quartu di e stese freàtiche sò cuntaminate), ind’è a robba à manghjà (i trè quarti di i frutti è a metà di i legumi ch’ùn sò bio cuntènenu pesticidii) sin’à ind’è u nostru sangue ! Secondu à uni pochi di stùdii sèrii, a spusizione prulungata à i pesticidii pruvucheghja limfomi, milomi, càncari, malatìa di Parkinson, disturbi cugnitivi, broncopneupatìa, brunschite, ma dinù alzheimer, disturbi ansiodepressivi, àsima, pattulugìe tiroidiane, pattulugìe pè u ciucciu di e donne incinte, ecc.* In u frà tempu, sparìscenu à una vitezza tremenda ape, farfalle, filangroche, culleoteri… è cù elli quelli chì i mànghjanu, cumè l’acelli, i pesci, l’amfibiani… Puru sò un aiutu preziosu, ùnicu, indispensèvule à a pullinisazione di e piante. 40 % di e spèzie d’insetti sò in perìculu. Un fenòmenu ingattivitu dapoi l’annate 50-60. Càusa prima : a pèrdita di l’abitati è l’usu di i pesticidii cù l’agricultura intensiva.
A Francia cuntinueghja à viaghjà à capu in ghjò, misendu nant’à ss’agricultura volta versu a cumpettitività internaziunale è u prufittu, chì cerca dunque à pruduce cù a facilità impippèndusi di i disguasti fatti à a natura è à l’avvene di l’Umanità. Più di 1000 circatori, duttori o scientìfichi, parechje Mutuelle di a salute, associ di a difesa di natura cum’è France Nature Environnement, ma dinù numarosi agricultori ch’anu capitu e scumesse d’oghje per una agricultura ragiunèvule, cum’è a Cunfederazione Paisana, anu pruvatu à scumbatte per impedisce l’adopru di sta lege assassina. Ùn ci hè statu nunda à fà.
A lege ùn si cuntenteghja micca d’autorizà di novu i neonicotinoidi. Rilancia e megabassine chì sfrùttanu l’acqua à u solu prufittu di i grossi pruduttori di cereali, incuragisce l’allevu industriale abbassendu e norme di cuntrollu è di pulluzione, intrava a pullizza di l’ambiente è tomba à pìccula agricultura ch’ùn pò micca luttà contr’à e spluttazioni smisurate chì a s’ingòllanu pocu à pocu.
A lege vulìa ancu affucà l’Anses, incaricata di u cuntrollu di i rìsichi sanitarii, ancu assai l’avucati di l’agricultura industriale ùn ci sò ghjunti per sta volta.
A lege Duplomb hè un sputu in faccia à i malati di i neonicotinoidi, frà i quali parechji sò aduniti in u cullettivu Càncaru Còllera, un sputu in faccia à l’agricultura bio chì scumbatte per tene arritta un agricultura di qualità, un sputu in faccia à a natura chì soffre già di u riscaldimentu climàticu è di tutte e pulluzioni umane, un sputu in faccia à u nostru avvene.
Ci vole 1000 anni à a terra per furmà dui à trè centìmetri di terra fertile, dice l’associu Terres de Liens. In Francia, 60 % di e terre sò già avvilite. Autorizà di novu i pesticìdii sparsi cù i droni rivene à polluà sempre più. E pruduzzioni càlanu micca per vìa di e norme ambientale, ma perch’è u mondu cambia è ch’ellu ci tocca à addattà e nostre manere di pruduce, rispettendu l’ecosistemi chì sòffrenu, cù menu acqua frazate, pruduzzioni di prussimità, agru-eculugìa, rispettu di i sepi è di l’abitati, selezione di sumente, scelta di nove culture più resistente, ecc. Vale à dì sempliciamente stà à sente à a natura è addattassi à u ciambuttamentu climàticu. •
Fabiana Giovannini.
*www.inserm.fr/expertise-collesctive/pesticides-et-sante-nouvelles-donnees-2021/
