S’hè spenta Lucia Giammari di u Muchjetu in u Cerviunincu. Avìa 85 anni. Lucìa era donna di ssa terra, militente appassiunata di lingua è di cultura corsa, schieta è generosa. Era sempliciamente di quì : di stintu, d’ànima è di core corsu !
L’umagiu di Praticalingua Piaghja hè bellu è conta bè ciò ch’ella tramandava, ècculu quì : « S’hè spenta a nostra cara Lucia Giammari, una donna di valore, chì era falata à Praticalingua per participà à l’attelli per “amparà qualcosa” allora chì, frà noi tutti, era ella quella chì ne sapia u più.
Sempre pronta à amparà è à sparte u so sapè è i so sapè fà, sempre pronta à contà i so stalvatoghji cun una ricchezza incridibbule è sempre pronta à lottà per a salvezza di a so lingua….
Scrivia puesie è nuvelle, facia disegni magnifichi, un’artista vera in tutti i sensi.
Speremu chè tù sì cun u to babbu chì ti mancava tantu è cun u to caru Silvestru.
Riposa in Santa pace o Lucì, ci ai da mancà…. »
Arritti manda cunduleanze afflitte à tutti i soi, parenti è amichi. Sò addulurite a nostra lingua è a nostra cultura. Ma cù ghjente cum’è Lucìa, si senterà parlà corsu in Paradisu. •
