L’agricultori sò in zerga. 10 mesi dopu à manifestazioni maiò pè u so putere di cumprà, ripìglianu i blucchimi è a còllera cresce un pocu dapertuttu. A FNSEA, a Cuurdinazione rurale, a Cunfederazione paisana, tutti sò mubilizati. L’agricultori si làgnanu di prucedure amministrative chì li pìglianu tuttu u so tempu ch’elli vulerìanu piuttostu passà cù l’animali o in e so spluttazioni. Chèdenu piani d’urgenze per salvà e filiere è fà cresce i so rivinuti. A vita paisana hè dura è ùn permette micca di guadagnà abbastanza soldi. I sindicati accùsanu u guvernu d’ùn avè appiecatu e prumesse fatte 10 mesi fà.
Ma frà e rivendicazioni ci hè l’urgenza di a signatura di l’accordu trà l’Unione aurupea è i paesi di u cusì dettu Mercosur, una pulìtica cumerciale cumuna trà i paesi d’Amèrica latina : Argentina, Brasiliu, Paraguay, Uruguay, Bolivìa. In più di i membri assuciati : Chili, Culumbìa, Equatore, Perù, Suriname, Guyana. Vale à dì 300 millioni d’abitanti. Hè u terzu bloccu ecunòmicu mundiale.
Face 25 anni ch’ellu si discuta trà u Mercosur è l’Auropa. L’accordu di lìberu scàmbiu hè neguziatu dapoi u 1999. U scopu hè di rinfurzà e rilazione cumerciale trà ssi paesi è quelli di l’Unione aurupea. E cunsequenze sò tremende per l’ambiente in Amèrica latina. Per risponde à a dumanda aurupea di carne vaccina, per un dettu, l’agricultori di u Mercosur anu da strughje torna mondu fureste amazuniane ricche in biodiversità. S’hà da ingattivisce u ciambuttamentu climàticu. L’Auropa hè una grande cunsummatrice. L’omu manghja di più in più carne allora ch’ellu ùn hè micca un carnazzeru naturale è chì sta cunsummazione eccessiva hè gattiva pè a so salute. L’accordu cuncerna tutti i settori, micca solu l’allevu di vacche. A cuncurrenza hè dinù per un dettu pè u pullame o e cereale. S’aspetta 100.000 pullami spurtati di più à l’annu, vale à dì a morte di mondu spluttazioni aurupee. Eppò ci hè u prublema di e norme, e cereale ch’anu da entre in Auropa sò cultivate cù l’OGM o certi pesticidii interdetti ind’è l’Unione aurupea. L’accordu di u Mercosur pone prublema è ambientali, e norme suciale è di prutezzione di l’ambiente ùn sò micca listesse. Da chì l’aurupei pòssinu manghjà di più carne è pullastri, l’Auropa spiazza i disguasti ch’ella face à l’ambiente in ssi paesi custì è i so pòpuli suppòrtanu e pulluzione industriale.
Per l’agricultori aurupei hè una cuncurrenza pèssima per vìa di i prezzi di spluttazione più bassi in i paesi di u Mercosur. I paisani i più dèbbuli anu da esse e prime vìttime. Ma ghjè tutta l’agricultura aurupea ch’hà da subisce e cunsequenze di sta gattiva cuncurrenza.
In iscambiu, l’Auropa brama di pudè vende e so vitture in Amèrica latina. Vale à dì, quì dinù, un perìculu per l’ambiente cù a crèscita di i gasi à effettu di serra è u riscaldimentu climàticu chì s’impeghjurisce. In u settore automòbile ma dinù in u settore farmaceuticu, i prudutti aurupei minàccianu millaie d’impiechi americolatini.
L’accordu permette dinù à l’industriali aurupei di spluttà e risorze miniere di u Mercosur, cum’è u lithium per un dettu, pè e vitture elèttriche, vale à dì torna mondu pulluzione è rìsichi pè e pupulazioni pòvere d’Amèrica Latina. A spluttazione di u lithium dumanda assai acqua è assecca e stese sutterrànie.
U Mercosur hè un accordu « neocoloniale » dinunzia u cullettivu Stop-Mercosur. Tuttu què per arrichisce multinaziunale industriale…
U mondu viaghja veramente à capu in ghjò ! •
