U nostru amicu è sustegnu Michè Angeli hà vintu u trufeu di l’Energìa di l’Agenzia d’Urbanìsimu è d’Energìa di a Corsica 2025 !
Tutti l’anni Troph’Énergies ricumpensa nant’à trè categurìe – prufessiunali, particulari è cullettività – belli prugetti per circà di riduce a cunsumazione energètica di a ghjente in Corsica.
Ci vole à dì chì tutti i prugetti sò interessanti è merìtanu assai. Ma Arritti, ci scuserete, hà u so core chì pendica versu u s’amicu di sempre, Michè Angeli di a panatterìa è a pastizzerìa I Fratelli Angeli. Ci volerebe ancu à dì oghje E Surelle Angeli postu chì e so trè figliole tènenu l’affare di manera magnìfica !
Michè in quantu à ellu ùn pianta mai, a sapemu. Sempre in traccia di pruiettassi è di riflette à u prò di a Corsica. Cusì migliureghja sempre a so impresa ch’ellu hà custruitu da giòvanu è chì s’hè fatta cunnosce quasi in tutta a Corsica. I Bastiacci elli, o i suttanacci chì còllanu versu Bastia, a cunnòscenu bè, ch’ùn si pò mancà nant’à u stradone à u locudettu Crucetta in Lucciana. Tutt’ognunu hà presu l’abitùtine di piantassi ind’è Michè. Hè un arretta sempre simpàtica è suchjulente cù tutti i bon’prudutti ch’omu pò truvà, ch’ellu sìa di panatterìa, di biscotti è biscuttini, di cicculata, di ghjacci… senza parlà di u ristrurante induve si manghja più chè bè in un ambiente fraternu !
Dunque, Michè hà postulatu à i Trufei di l’Energìa di l’AUE è hà vintu in a so categurìa di i prufessiunali ! È chì piacè di sèntelu fà a prumuzione di u so prugettu nant’à un filmettu fattu à postu è chè vo pudete visiunà nant’à a pàgina di l’AUE. « Andàteci puru l’ochji chjosi chì l’ecunumìe è u benestà sò assicurati ! » ci dice Michè. L’Impresa hà fattu a stugiatura cù l’isulamentu di u tettu nant’à trà 800-850 metri quadrati, spieca torna u nostru amicu. Pò anu stallatu dui pannelli sulari di 300 litri, « l’ecunumìa ùn hè micca nunda, da 6.000 à 10.000 àuri à l’annu », per una spesa di 12.000 € cù un sustegnu d’à pocu pressu 50 %. Vale à dì, l’impresa entre in fùria in i so soldi !
U scopu per dumane hè di pudè copre à a fine tutta a cunsumazione d’energìa di l’impresa. Ghjè dì chì i prugetti ùn sò ancu finiti ! È quantu ssa bella « impresa di famiglia dapoi più di 60 anni, s’investisce in a transizione energètica è eculògica » dice torna Michè chè no sciaccamanemu !
Da nutà chì cù ellu, cuncurravanu dinù i nostri amichi di Qualitair cù un bellu prugettu per luttà contr’à u radon
I prèmii sò stati rimessi in Aiacciu u 17 di dicembre scorsu. U soiu li hè statu rimessu da a presidente di l’Assemblea di Corsica, Nanetta Maupertuis.
È cù ellu sò stati dinù premiati in a categurìa di e Cullettività, a cumuna di San Niculau, è Marie-Ange Arrighi frà i particulari. Felicitazioni à tutti ! •
• Infurmazioni : www.facebook.com/aue.corsica
• U filmettu : www.facebook.com/share/v/14QdSPn41i6/
