Adupratu d’ottobre 2015, u Padduc hà 10 anni. Hè una direttiva territuriale d’accunciamentu di u territoriu messu in ballu da i Corsi pè i Corsi. Un documentu chì si vole veru prugettu d’avvene, è à tempu abbastanza cumplettu per mette in ballu u sviluppu di a Corsica. In fatti hè un prugettu di sucetà. Ch’averà forse qualchi difettu ma chì hà u mèritu di dà un quadru di travagliu quandu ùn ci era nunda nanzu. Cuntene sei libretti, frà i quali un librettu regulamentare, u diagnosticu territuriale, u pianu di sviluppu durèvule, u scemà d’acconciamentu territuriale, l’evaluazione ambientale è una sintesi. Cuntene dinù nove documenti specìfichi cum’è a càrtula di lotta contr’à a precarità, u pianu di a muntagna, u librettu liturale, u scemà di l’infrastrutture di i trasporti, a trama verde è azuru, u scemà di messa in valore di u mare, e càrtule di lucalisazione di i spazii rimarchèvuli o specìfichi di u patrimoniu naturale è culturale di u liturale, u scemà di l’urientazioni turìstiche, u scemà di l’urganisazione territuriale è di l’ordigni culturali strutturante…
À l’èpica, 10 anni fà, era statu cunsideratu cum’una vittoria da i naziunalisti è un mumentu stòricu pè a Corsica. Cosa s’hè passatu dapoi tandu per ghjunghjenne à l’indiferenza o à crìtiche ? Nunda in fatti. U Padduc ùn hè statu appiecatu cum’ellu si duvìa. È ghjè bè u so prublema. Si lamenta u Levante : « i prugetti immubiliari cunsumatori di spàzii stratègichi agrìculi si multiplichèghjanu torna, è torna !… U Padduc hè un bon’Padduc, un bon’prugettu di sucetà. Disgraziosamente, ùn si pò capisce ch’ellu ùn sìa micca appiecatu in ciò chì cuncerna e terre agrìcule ».
In un riportu annant’à Via Stella u 19 di dicembre scorsu hè annunciatu chì « 23.00 èttari, 23 millioni di metri quadrati, sò stati artificializati in Corsica… suvente per fà residenze secundarie nant’à u liturale o nant’à e terre fruttifere » dìcenu U Levante è altri associ di difesa di l’ambiente, cum’è Le Garde o ABCDE, chì anu puru mustratu da e so azzioni in ghjustizia, « ch’appiechendu u Padduc si pudìa luttà contr’à a betonisazione sfrinata ch’ella cunnosce a Corsica ».
Annullazione di 12 piani lucali d’urbanìsimu (PLU) è di duie carte cumunale nant’à cumune liturale, o zone custruttìbule nant’à spazii agrìculi, annullazione dinù di 60 permessi di custruisce (PC) o d’accunciamenti liturali (PA), u bilanciu di l’associ, puru cù pochi mezi, hè da salutà. « Qualchi centinaia d’èttari di terre agrìcule, tutte liturale, frà e quale assai spazii stratègichi agrìculi (ESA) vale à dì e più ricche, sò state cusì priservate in grazia à l’azzioni assuciative ». U Levante si lagna, è cù raggiò, di u lasciacorre di u Statu, di a Cullettività di Corsica è di certi merri durante à ssi 10 anni. « U cuntrollu di legalità sti pochi anni s’hè migliuratu ma ùn basta micca » dice torna u Levante. In quantu à a CdC « hà ricusatu sistematicamente di diferisce in ghjustizia l’autorisazione d’urbanìsimu è ghjè un veru peccatu ». Solu u PLU d’Aiacciu hè statu deferitu dice torna l’associu pè u quale « a prutezzione di l’ESA è di u fundariu agrìculu hè un fiascu tutale di u Statu (in càrica di u cuntrollu di legalità), di l’Esecutivu di Corsica (chì duvìa fà appiecà u Padduc è u còdice di l’urbanìsimu) è di merri ch’anu datu permessi illegali : a so rispunsabilità hè tamanta ».
U Padduc hè una lege chì si sò dati i Corsi stessi dopu à anni è anni di scàmbii, stùdii è dibàttiti. Hè statu tandu un attu di rispunsabilisazione paru à un attu d’autodeterminazione. Chì valerà l’autunumìa sè no simu incapaci di fà rispettà e nostre pròpie lege ? •
