N’avemu già parlatu parechje volte nant’à ssa rubrichella, e donne afgane sò marturiate cum’è mai : feminicidii, furzature, matrimonii imposti, zitellette vindute à omi di 40, 50, 60 anni, arrestazioni, torture, cundanne à a prigiò, marturiate da i so carceraghji, o chjose in casa, schiave di u so maritu è di a so famiglia, trattate cum’è cane, interdette di scola, d’educazione, di surtite sole, ublicate sempre d’esse accumpagnate da un mahram, vale à dì cunviada da un omu, interdette di ride in pùblicu, di ballà, di cantà, di scrive… Abandunnate à a so sorte, senza prutezzione ghjurìdica, senza pudè curassi, senza aiutu psiculògicu, o sempliciamente umanu. Càmpanu terrurizate, vìttime di viulenze di tutte e sorte, impuvarite, capu bassu, murtulone vistute d’un velu da a cima à in fondu… A lege nant’à a prevenzione di u viziu è a prumuzione di a virtù ristringhje sempre più i so dritti. A Missione d’Assistanza di e Nazioni Unite in Afghanistan (Manua) hà fattu sapè chì donne sò state interdette di partecipà à e preghere di u ramadan in e muschee in Badghis è Herat per un dettu. È dapoi stu mese di lugliu, sò decine d’arrestazioni per via di i so vestiti ch’ùn sò micca regulamentarii. U regulamentu ormai hè a burqa, chì li copre sanu sanu u visu è u corpu. Secondu à Amnesty Internaziunale e viulenze fatte à e donne è e zitelle hè cresciutu di 40 % cù i talibani, è 14,2 millioni di donne sò in perìculu cutidianu. Ma ciò chì e donne sògnanu u più ghjè a dignità è l’amore, a tennerezza di a vita, u sole nant’à a so pella, pudè lasciassi andà capu in i nùvuli, cappiendu u so velu è ballendu à u rìtimu d’una mùsica pruibita…
Voce di donne feministe afgane (VFFA) seguita a sorte di sse donne è cerca à pòrghjeli sustegnu. L’associu prova cusì à parlanne nant’à i retali è còntanu stòrie accadute à sse donne è à i soi dinù, chì certi mariti, fratelli o babbi pròvanu à difèndele.
Cusì, VFFA conta a stòria di Mehrabuddin Ahmadi, anzianu rispunsèvule di u guvernu afganu, veterinariu di u so mistieru, hè statu tichjatu à calci è à pugni è ghjittatu in prigiò a settimana scorsa, da l’agenti talibani di u ministeru di a prumuzione di a virtù. In fatti, a so sposa è u so sòceru sò stati arrestati in Herat per via, puru infaldetata, ch’ella purtava un mantellu. Ahmadi s’hè resu in fùria à a prigiò bramendu di pudè falli sorte di prigiò. Dumandendu a so liberazione, hè statu disprezzatu da i talibani, insultatu, trattatu di « senza onore » per via ch’ellu avia lasciata sorte a so moglie senza burqa. A so zerga s’hè cambiata in furore, l’anu assaltatu, è pigliatu à calci è à pugni, minèndulu à parechji è ghjittèndulu insanguinatu in prigiò. Mezu mortu, s’hè intesu male è i so boi si sò risuluti à purtalu à l’uspidalu… Ma ùn si sà ciò chì li hè accadutu dopu, ancu di menu à a so moglie è à u so sòceru…
I talibani anu multiplicati i decreti ch’impònenu pràtiche discriminatòrie contr’à e donne, ma dinù contr’à e minurità di tutte e mamme, ètniche, religiose, o di gèneru. Secondu à Manua, fòrzanu omi di a cumunità ismaeliana (chiite) à cunvertìscesi à l’islam sunnite. Quelli chì ricùsanu sò minacciati di morte. Ghjurnalisti, prufessioni medicali o di l’educazione, sò perseguitati è cundannati per un sì o per un nò. L’esecuzioni senza prucessi, o prucessi abusivi, si multiplichèghjanu. L’Aghanistanu hè ghjuntu un paese prigiò. •
