Tamanta pena stamane d’amparà a morte di u nostru amicu Petru Cervetti, sindicalistu cusì stimatu chì fù durante anni è anni à u capu di a CFDT Corsica.
Petru era l’incarnazione di a manca autunumista, à u PSU in l’annate sissanta è sittanta, è dopu cum’è sindicalistu chì hà assai cuntribuitu à fà chì a CFDT Corsica fussi un appoghju sicuru pà e nostre idee.
Petru era dinù un autunumistu cunvintu è hà sempre aiutatu e nostre mosse pulìtiche, manifestendu una grande prussimità cù Edmond Simeoni.
Arritti pienghje dinù un lettore fidu. Mandemu e nostre cundulianze e più sincere à i soi, à a so figliola Federica, à u so maritu Jean, à i so purfiglioli, à e so surelle Andrìa è Marìa Rosa, è à u so fratellu Carlu. Riposi in pace, amicu caru. •
