U nostru amicu caru, Pierre Jean Stefani, merre di Pedipartinu s’hè spentu stu 7 di ghjennaghju 2024. Avìa 60 anni.
Arritti hè adduluritu assai cù tutta a so famiglia, amichi di sempre. Petru Ghjuvani era u sposu di Stella, è u babbu di Bettina è Maria, u fratellu di i nostri amichi Ghjuvan’Francescu Stefani è Martina Gerin.
Militente autunumista, ùmile è discretu ma sempre presente, fidu è generosu, Petru Ghjuvani campava u so militentìsimu corsu in paese, à risponde à tutte e chjame, cum’ellu a face un merre attenti à e difficultà di a so ghjente. Era merre dapoi u 2001, avìa presu a sèguita di u so fratellu Ghjuvan’Francescu Stefani. Pedipartinu hè un paisolu di a Castagniccia, u più chjucu di l’Orezza, è ci vole à ghjunghjeci !… ma Petru Ghjuvani s’impegnava à u cutidianu cù passione è generosità, in merrìa, cù mondu prugetti, o à u senu di l’associu A Ceppa, d’animazione rurale.
Cresciutu trà Bastia è u Cuntinente, da chjucu passava l’istatina in paese, è hà fattu naturalmente a scelta di campacci cù a so moglie Stella, per allevà e so duie figliole. « Hè stata una scelta, ma si pò campà in paese senza prublemi » dicìa qualchi annu fà nant’à l’emissione Sopra à locu di RCFM. È n’hà fattu cù maestrìa a dimustrazione, impegnendusi per tutta l’Orezza. Frà e so più belle realisazioni, malgratu u pocu mezu per investisce, hè stata a pissina municipale l’Onda, fatta in u 2003, una bona per tutti i giòvani di u cantone, un locu di piacè per adunisce ghjente l’istatina, paisani è turisti. Ghjè dì a vuluntà di fà ch’ellu avìa è u bè ch’ellu hà purtatu à u so paese ! Petru Ghjuvani ùn si piantava à u mancu di mezu per agisce. Era un Corsu di l’interiore, un omu di a terra. Un amicu per tutti. Hà da mancà assai è tutta l’Orezza hè in dolu.
Arritti manda e so cunduleanze afflitte è fraterne à tutti i soi, parenti è amichi.
Riposi in pace o caru, in a to tarra orezzinca. •
