Allora ch’ella principia a stagione di i fochi in Corsica cù spetàculi tremendi torna di fiame immensi ind’a notte di Balagna trà Felicetu è Muru… u Brasiliu brusgia sempre.
A più bella furesta di a pianetta, a so riserva d’ossigena, si consumma in Amazunia. Face mesi ch’ella duri, è secondu à i specialisti, brusgierà tutta l’istatina, cundannendu un ecusistema inestimèvule pè a pianetta.
Tutti l’anni, a furesta amazuniana perde decine di millaie d’èttari durante a stagione di i fochi, impeghjurita da i fochi criminali, ch’ellu incuragisce u presidente Bolsonaro chì vole apre a furesta trupicale à l’attività agrìcula è à a spluttazione miniera.
6 803 fochi anu picciatu ssu mese di lugliu, vale à dì 1 500 di più chè annu. È u mese di ghjugnu era già statu u più gattivu dapoi 13 anni ! Mai, l’Istitutu naziunale di ricerca spaziale avìa arregistratu un bilanciu sìmule. I fochi annu cresciutu di più di 60 % per raportu à i trè anni scorsi. Annu, sò 73 000 èttari chì sò smariti. È omu s’aspetta à un bilanciu più grave torna quist’annu, postu ch’ellu hà cresciutu di quasi 20 % u nùmaru di l’incèndii.
A furesta amazuniana agrotta 10 % di e spezie salvàtiche di a pianetta. Per divvi a catastrofa eculògica in più di a pèrdita di ss’arburoni millenarii, senza parlà di i pòpuli autoctoni in perìculu di sparizione anch’elli ! In un mezu sèculu, l’Amazunia hà persu un quartu di a so furesta ! U più per sparghje l’allevu, cultivà leguminosi per nustrisce l’animali chì saranu manghjati in Auropa !
A lotta pè a priservazione di a furesta amazuniana hè una di e scumesse à vene. L’Auropa hà di chè pisà nant’à e decisioni di Bolsonaro. I paesi aurupei è cù elli l’Unione aurupea sò rispunsèvule di 36 % di a pèrdita di a furesta. A Francia per un dettu sporta più di trè millioni di tunnellate di soja per nutrisce u so bestiame.
Ci tocca à cambià di versu per via di e pruduzzioni agrìculi, di a manera di nutrìsceci, pudemu manghjà menu carne per un dettu, pudemu pisà nant’à e grande imprese francese ch’invistìscenu à u Brasiliu è partecipèghjanu à strughje ssu pulmone di a pianetta. Ci tocca dinù à mubilizacci contr’à prugetti infami cum’è quellu di a « Muntagna d’oru » in Guyanne.
« U guvernu ùn deve più fà entre in Francia prudutti nati da a sfurestazione è a cunversione di l’ecusistemi naturali » dice Greenpeace.
Secondu à u CNRS, « sè a sfurestazione franca 40 % di l’Amazunia, ghjunghjeremu à un puntu di ruttura è a furesta ùn puderà più ricustituìscesi. »
I fochi ingattivìscenu dinù a lotta contr’à l’emissioni di gaz à effettu di sera è dunque e cunsequenze di u riscaldimentu climàticu. Ci vole à dà di pettu à a prublemàtica contr’à i fochi, quì in Corsica cum’è in u mondu. In Corsica, si capisce, è ghjè per noi una di e scumesse forte, a priservazione è a messa in cultura di i spazii stratègichi agrìculi hè imperativu per dà capu à ssa prublematica mundiale.
