L’infurmazione ùn hà fattu tantu rimore in i grandi mèdia. Un impresa ullandese hà ricusatu di travaglià pè u Mundiale di u ghjocu à pallò previstu in 2022… chjìbba ! Ùn hè ne per vìa di u Covid, nè per vìa di u mercatu bellu grossu ch’ella pudìa mèttesi in stacca (doppiu chjìbba !), ma per vìa di e cundizioni di travagliu di l’operai impiecati. Sta sucietà si chjama Hendriks Graszoden, hè un abituata di i Mundiali di futbol, per vìa di e so cumpetenze pè i prati di ballò. Ghjè ella ch’hè stata incaricata di i prati di a Cuppa di Mondu di 2006 in Allemagna, a Cuppa aurupea di 2008 in Svìzzera, è quella di 2016 in Francia. L’affare hè abbastanza straurdinaria per parlanne un pocu nè ? U mèritu hè naziunale perch’è a maghjurità di u pòpulu neerlendese saluta ssa decisione « ètica ». «Avemu vistu ciò chì si passa quallà » hà dettu u purtavoce di l’impresa Gerdien Vloet, « avemu vistu cumu si sò custruiti i stadii di ghjocu à pallò. L’operai ùn avìanu micca vestiti di prutezzione. Si vede a diferenza trà l’abitanti di u Qatar è l’operai migranti » dice u rispunsèvule di Hundriks Graszoden stumacatu da ciò ch’ellu hà amparatu u mondu di e cundizioni di sti corci impiecati. Secondu à u ghjurnale brittànicu, The Guardian, sò 6500 operai chì sò morti durante à a custruzzione di i stadii di u Qatar. Face 10 anni chì u paese apprunta a cuppa di u mondu di u ghjocu à ballò. Sette stadii novi, in più di quelli già prugrammati, un aeruportu, strade, trasporti pùblichi, alberghi, una cità nova hè creata dinù… Per esse prontu à tempu, u Qatar hà fattu vene manu d’òpera di u stranieru. E so cundizioni di vita sò tremende in un caldu stremu. U caldu dunque, e crise cardiache, e cascastoghje… ma ùn ci hè nè autopsìa per sapenne di più nant’à u so martoriu, nè cundizioni addattate per permètteli di suppurtà sse timperature streme ! « 6500 travagliatori immigrati da l’Ìndia, u Pachistanu, u Nepal, u Bangladesh, u Sri Lanka morti dapoi 10 anni, face una mediana di 12 morti à u ghjornu » dice The Guardian ch’ùn hà fattu a so inchiesta chè in ssi paesi custì. U bilanciu sarebbe di più tremendu dunque postu chì numarosi travagliatori di u Kenya o di e Filippine ùn sò stati cuntabilizati. Cume ùn sò stati cuntabilizati l’ùltimi mesi di u 2020. Sò dui millioni di personi à esse stati impiegati in e custruzzioni. U Qatar ellu, parla di solu 37 morti… è a Federazione Internaziunale di Futbal (FIFA) pare cuntentassi di e so spiecazioni, chjudendu l’ochji nant’à ssu sfragellu.
Parechji club di u Danemark è di a Norvège chjàmanu à u boycott di u Mundiale. Ma a FIFA l’hà minacciatu di sanzioni finanziarie è d’interdizzioni à e pròssime cumpetizioni. Ghjè dì quant’ellu face paura di vede uni pochi di paesi fà listessu. U business si n’impippa di i corci impiecati morti pè a so càusa ! Capite, s’aspetta milliardi di dritti TV è di publicità ! Chì stumachjeghju ! Ci vole à esse scemi per ghjucà à u pallò à 50 gradi è più. Di chè fassi penseri dinù pè i ghjucatori… Di manera eccezziunale, s’hè sceltu di attempà u mundiale, da ghjugnu à nuvembre ciambuttendu i campiunati naziunali… Pàrenu fole ! È per rassicurà u pùblicu, i stadii prevèdenu una climatisazione in pien’aria, à livellu di i pedi di i sustenitori per circà di rinfriscalli… Umbeh ! Ssu mondu viaghja veradimente à capu in ghjò ! •
