Christiane Muretti s’hè spenta u 24 d’aprile à l’età di 68 anni. Arritti pensa à tutti i soi, à a so figliola Anna Laura Muretti Aillaud, u so sposu Toni Farellacci Aillaud, i so fratelli è surelle, nipoti, è amichi.
Christiane hà raghjuntu u so figliolu ch’ella hà tantu pientu, Nicolas Montigny.
Era una militente naziunalista fida è divota, à fiancu à i prigiuneri è à tutte e nostre lotte dendu di u so tempu è di u so impegnu à tutti, senza mai stancassi. Malgratu malanni è dulori chì l’anu tocca, era sempre à sustene e suffrenze di l’altri.
S’era fatta l’avucata di l’associu ch’ella animava « pè u drittu di more ind’è a dignità. »
Tocca dapoi anni da una gattiva malatìa, avìa dichjaratu : « a mo mamma s’hè spenta in 2019 di a stessa pattulugìa è e so duie ùltime annate sò state tremende… ùn vogliu finisce cusì. L’angoscia d’ùn pude decide chjaramente hè peghju chì quella di more »… Avìa dunque decisu d’andà in Svizzera per fassi aiutà. Hè morta cum’ella hà campatu, lìbera è degna dopu à una vita di suffrenza.
Spartimu u dulore di i soi è li mandemu basgi affettuosi. Riposi o Cristiana in a pace chè t’hai tantu circatu. •
