Trista nutizia stamane : Dédé Acquaviva, dettu Capitanellu, si n’hè andatu à l’altru mondu. Era u babbu di u nostru deputatu di a seconda circuscrizzione cismuntinca, Ghjuvan’Felice Acquaviva.
Dédé, cù i so cucini luzzinchi Max è Edmond Simeoni, fù di i primi militenti di a causa di u pòpulu corsu.
Da u principiu, hà raghjuntu l’ARC è l’UPC, è s’hè fattu militente à 100 %. Hà cuntinuatu u so ingaghjamentu seguitendu strade diverse, mà hà sempre tinutu cara a so prima famiglia pulìtica, è Dédé fù à u core di a dimarchja quandu s’hè criatu Femu a Corsica, à fianc’à u so figliolu Ghjuvan Felice.
Era dinù un militente di a lingua, à l’ànima pueta chì si piacìa à impruvisà. Un veru Niulincu.
Omu di gran’valore, ben cunnisciutu in Bastia induv’ell’hè statu dintistu durante decine d’anni, apprizziatu da tutti, Dédé era di a prima generazione di u rinovu pulìticu di a Corsica. Oghje ssa generazione si ne và. Mà a so làscita hè tamanta !
Poi ripusà in pace, o Dédé.
Arritti manda e so cundulianze afflitte à Ghjuvan Felice, à Lea a so cumpagna, à Battista u so figliolu, è à tutti quelli tocchi da ssu dolu. •
