S’hè spentu u 3 di ghjennaghju Ghjiseppu Santana. Ghjurnalista, scrivanu, avìa publicatu ind’è l’annate 90 è durante parechje anni Le Guide des Vins et produits corses, cuntribuendu à u rinommu di i vini corsi.
Autore dinù di Le guide du football corse andava sinu in i paesi i più persi da fà cunnosce u so futbol…
Autore torna di l’òpere Cursichella, da fà cunnosce e nostre pieve, u Capicorsu, u Nebbiu, l’Alta Rocca, a Balagna… parlendu di e tradizioni, i lochidetti, i prudutti, a ghjente, e specialità cucinare…
À chì cunnosce a so figliola, Lìvia, a nostra amica chì s’hè fatta ghjurnalista anch’ella, omu capisce sùbitu in grazia à quale hà truvatu a passione di a scrittura, di u ghjocu à pallò, di a gastrunumìa… è ben intesa di u mondu di a stampa. Lìvia è u so fratellucciu Matteo li anu resu un bellu umagiu truvendu a forza di testimugnà di a vita di u so babbu.
Ghjiseppu Santana era un omu di cultura, appassiunatu di pittura è di u Caravaggio, di sinemà è pè u più di sinemà talianu. Hè partutu troppu giòvanu à l’età di 63 anni, lasciendu trè figlioli, Brian (è a so mamma Chjara Vadi), Lìvia (è a so mamma, a nostra amica cara Marìa Luzia Ambrosini) è Matteo (è a so mamma Marylin Marchini).
Arritti, chì hà avutu u piacè di travaglià cù ellu à l’èpica di e so guide, manda cunduleanze afflitte à i so figlioli, u so fratellu, e so surelle, è tutti i soi, parenti è amichi adduluriti.
Riposi in pace o Ghjisè. •
