Èranu di i primi, èranu di i più ingagiati, èranu paisani fraterni è fidi : èranu cusì i trè fratelli, Petru, Lisu è Lucianu, u più giòvanu, chì si n’hè mortu ss’ùltimi ghjorni. Èranu cucini è vicini d’Andrìa Fazi in Sant’Antone di Ghisunaccia. A so casa era sempre aperta, è purtàvanu senza sfiatà a fede naziunale è a fiertà d’esse corsu.
Lucianu Fazi fù durante vint’anni un sociu di u Cunsigliu Supranu di l’Unione di u Pòpulu Corsu. Ùn hà mai mancatu, ùn hà mai sviatu, hà marcatu i so lochi d’una stampa ginirosa, è c’hà lasciatu u ricordu d’un omu corsu arrittu pà a salvezza di u so pòpulu.
À tutti i soi, Arritti manda e so cundulianze afflitte è fraterne. Ch’ellu riposi in pace. •
