S’hè spentu u 14 di ghjennaghju à l’età di 92 anni, Jean-Hugues Colonna, babbu d’Yvan, di Cristina, presidente di u Cunsigliu naziunale di Femu a Corsica, è di Stephane Colonna. Membru di u partitu sucialista, era statu deputatu à l’assemblea naziunale da 1981 à 1988.
Hà raghjuntu oghje u so figliolu, Yvan, assassinatu in 2022, è a so moglie Cicilia, morta in u 2025. Lascia u ricordu d’un umanistu, ingagiatu per fà ricunnosce l’innucenza di u so figliolu.
« Omu arradicatu ind’i valori di ghjustizia è di u rispettu di l’Omu, hè statu deputatu è ci ramintava spessu l’èpica di a siconda guerra quandu a famiglia Colonna piattava ghjudei di e milizie fasciste » ramenta Femu a Corsica in l’umagiu ch’ellu li hà resu : « Fù un omu corsu, arradicatu, agalapatu, sempre di bon’cunsigliu, chì tenia caru à i soi ».
Arritti manda cunduleanze afflitte è fraterne à Cristina è tutti i soi, parenti è amichi adduluriti. Ch’ellu riposi in pace. •
