Si n’hè andata Teresa Cesari, nata Rinieri, à l’età di 97 anni. Era a mamma di i nostri amichi Antone, Francesca, Luisa, Rosanna, Pasquale è Fanfan. Mamma, mammone, arcimammone, è ancu arci arcimammona, Teresia era una fiura di u paese di Corti, cunnisciuta è appreziata da tutti, ànima di dulcezza è di bravezza. Era d’un antru tempu, di quellu induve omu s’aiutava è campava l’antica sucetà agrupasturale. Cù ella, si gira una pàgina di vita d’un èpica di fraiutu è di sulidarità, quandu Corti era sempre un paisolu. Ugnunu s’ammenta Teresa chì vendìa e so fritelle è sparghjìa prò è cunsiglii, cù u so pìcculu surisu di tennerezza è u so spìritu un pocu stuzzicaghjolu.
Ci era assai mondu è emuzioni ssu 25 di ghjennaghju in a ghjesgia San Teofilu di Corti per dilli l’ùltimu avvèdeci. L’umagi sò stati à livellu di ciò ch’ella fù a so vita, una vita pietosa di cumpassione è di presenza per tutti quelli ch’anu avutu u privilegiu di cunnòscela.
Arritti manda pensate affettuose à tutti i soi.
Ch’ella riposi in pace in Paradisu. •
