U mondu culturale hè torna in dolu cù a sparizione bruttale in un accidente di mottò di Cristofanu Ettori, u 12 di ghjennaghju scorsu. à l’età di 36 anni.
Ghjòvanu babbu di famiglia d’un zitellucciu di 2 anni è d’un antru ciucciu torna à vene, Capurale di i spendifochi prufezziunale in u Centru di u Rizzanese, era dinù cantarinu à u senu di u gruppu Svegliu d’Ìsula, è di u gruppu ulmetese Babbi Verdi. Era militente di a nostra lingua è di a nostra cultura, pregnu di tradizioni è di valori nustrali, è dinù cunfratellu à a Cunfraterna Spìritu Santu in Ulmetu.
Sèmplice, generosu, allegru, omu di bè, omu di valori, i testimogni sò numarosi per dì a pèrdita tamanta pè i soi, è pè a Corsica, è u viotu in i cori ch’ellu lascia.
Dìcenu i s’amichi di Svegliu d’Ìsula :
« U nosciu frateddu di cantu dapò 20 anni ci laca quì à cori in pistìcciuli da quant’edd’hè dura à imaghjinà a vita senza eddu. Hè bedda simplici, quandu Cristofanu affaccaia in calchì docu, subbitu l’ambiu muttaia, è ugnunu sapia chì c’aiami da campà d’a risa è chjachjarà, tarruccà, cantacciunà incù un omu di bè. L’omu era un fiumu di gioia è di bravezza. À tempu forti è dolci. Arraghjunatu è un pocu tuntinu. T’avia una piazza in u cori di tutti quiddi chì l’aiani fraquintatu da quant’edd’era impastatu di qualità. »…
Hè statu purtatu in terra in u so paese d’Ulmetu, ch’ellu riposi in pace è chì i soi pòssinu truvà sustegnu è cunfortu. À a so moglie, i so figlioli, tutti quelli adduluriti, Arritti prisenta e so cunduleanze afflitte. •
