S’hè spentu u nostru amicu caru, Henri Angelotti, à l’età di 84 anni. Henri era militente di Femu a Corsica è pè u più di u rughjone bastiacciu induv’ellu ci hà accumpagnatu un bellu pezzu per custruisce e vittorie.
Henri era cunnisciutu per avè fundatu a scola di cundutta CESR 20 è n’hà furmatu cunduttori ! Era cunnisciutu è appreziatu assai dinù in u mondu spurtivu, appassiunatu di bicicletta cù u so club Corsica Azur Bastia era assai presente è dinàmicu. Avìa creatu u giru di Corsica prufessiunale ind’è l’annate 80 è avìa riesciutu à fà vene ancu Bernard Hinault in u 1982. Cunniscìa mondu ghjente, frà i quali Carmine Castellano, direttore di u giru d’Italia. Cusì bramava di fà vene il giro sin’à in Corsica ! Avìa dinù creatu una cumpetizione internaziunale di triathlon.
Ma i so amichi militenti u cunnòscenu dinù pè u so capu in bullore sempre à prupone edee nove. Sunniava (sempre in a mubilità) di vede un telefericcu in Bastia, da raghjunghje i quartieri alti à u centru cità. Era unu di i scarsi dinù à parlà di cabuttasgiu marìttimu per sgurgà u centru cità di e so vitture. Era cusì Arrigu, sempre à riflette, à imaginà, à prupone.
À i so figlioli è figliulini, parenti è amichi, Arritti prisenta e so cundugleanze afflitte. Riposi in pace o amicu ! •
