Un amicu, un fratellu, un corsu di prima trinca, un bastiacciu di core… Si n’hè andatu Ghjuvan’Ghjàcumu Dussol à l’età di 70 anni.
Jean Jacques era un artisgianu di a vittoria naziunalista in Bastia, in 2014. 11u nant’à a lista di Gilles Simeoni, era dapoi a leva di l’annate 70 à u latu d’Edimondu Simeoni è di tutte e lotte ch’anu custruitu sta vittoria. Militente culturale, era fra i membri fundatori di u gruppu l’Albinu. U piènghjenu tutti i gruppi è artisti isulani chì sapìanu u so impegnu è u so stintu culturale. Militente di u suciale dinù, Jean Jacques era vicinu à a ghjente, à u latu di i più precarii. Era statu vicipresidente di u CCAS in Bastia.
Era una figura di u Mercà è di u Vechju Portu di Bastia.
Arritti manda a so affezzione fraterna à tutti i soi afflitti, moglie, figlioli, surella, nipoti, tutti i parenti è amichi. A so gentillezza, u so surisu, e so macagne è e scaccanate cù l’amichi, u so colpu di manu sempre generosu, ci mancheranu assai. Riposi in pace o caru. •
