S’hè spentu u 18 di ghjennaghju Michele Padovani, anzianu militente di u FLNC è di a Lotta di Liberazione Naziunale. Era statu prigiuneru pulìticu, cundannatu da a Corte di Sicurezza di u Statu in u 1978 pò graziatu in u 1981. Membre di Core in Fronte, Michele era dinù un militente contr’à u fascìsimu è u razzìsimu è criticava assai a strema dritta corsa chì si para oghje di cusì dettu naziunalìsimu corsu, sviendu i so valori.
Core in Fronte li rende umagiu diciendu : « In 50 anni di lotta, u so cumbattu pè i diritti naziunali è suciali di u pòpulu corsu ùn avia mai cambiatu. Era sempre à fiancu di i più chjuchi è di l’inghjuliati, essendu un cumbattente pè a ghjustizia è a libertà. Michel fù un patriottu chì purtava sempre in core stu sanu parè, di a Lotta di Liberazione Naziunale, cum’è tandu hè statu custruitu. Era un umanistu è un omu di valori. Hè statu curagiosu è crìticu contr’a u Muvimentu Naziunale, dopu à a strage di Furiani è l’anni foschi di u 1990. Era, dinò, unu di quelli chì luttava contr’a tutti i fascìsimi è e so idee, chì vòlenu impònesi in Corsica è in u mondu. Oghje, cuntinueghja a so lotta. »
Arritti prisenta e so cunduleanze fraterne à tutti i soi. Ch’ellu riposi in pace. •
