Seguitemu stantarati a morte in diretta à a televisione, descritta cù eccitazione da i giurnalisti chì cummèntanu a guerra, e minaccie nuclearie, e strategìe militare à u rìtimu di e bombe chì fàlanu secche è cutrate nant’à l’omi, suldati o nò… Tuttu u Mèdiu Oriente s’infiara. L’Iranu sott’à e bombe lampa e soie nant’à Israele è e base militare americane di sicuru, ma dinù infrastrutture è civili in Arabìa Saudita, u Qatar, Barheim, u Koweit, Oman… U Libanu hè dinù in guerra. U mondu àrabu si trova vìttima anch’ellu, l’islamìsimu hà toccu e so lìmite streme, u mondu pare inscimulitu è e chjame à u diàlogu belle fràciche…
Suspesa à e catene d’infurmazioni, stò à sente à Trump chì parla di a guerra… Hà prufitatu di rimette a medaglia d’onore à trè suldati americani, u capisergente Roderick W. Edmonds, eroe di a seconda guerra mundiale, u capisergente Michael H. Ollis, eroe di a guerra in Afghanistanu, chì s’hè sacrificatu per salvà un antru suldatu u 28 d’aostu 2013, è u capisergente Terry P. Richardson, 78 anni, eroe di a guerra di u Vietnam, ch’hà salvatu parechji di i so suldati in operazione u 14 di sittembre 1968…
Ci hè vulsutu aspettà 58 anni per Richardson per riceve ssa medaglia, più alta distinzione militare in Amèrica. 13 anni à i parenti di Ollis per onorà u so figlioglu mortu à 25 anni nant’à un campu di guerra. In quantu à u corciu Edmonds, ùn hà micca campatu abbastanza vechju postu ch’ellu hè mortu à 66 anni in u 1985.
• Leghje dinù : Pendant les élections… Le monde bouge
Eru dunque in traccia di stà à sente e nutizie d’Iranu è Trump spiecà ciò ch’ellu avia fattu è ciò ch’ellu ferà di pettu à a « grande minaccia » è u « regime terrurista tremendu » di l’Iranu ch’ùn hè micca statu à sente i so « avvertimenti », ch’hà cuntinuatu u so « prugramma nucleariu », à tempu chì a crèscita di « u prugramma di missili balistichi cunvenziunali »… « I nostri scopi sò chjari » hà dettu torna Trump, « strughje e capacità di fabricazione di missili di l’Iranu… annientà a marina… è fà di manera chì ssu regime chì sustene a terrore ùn àppia mai l’arma nuclearia »… « purtemu u dolu di i nostri suldati tombi »… eccèttera, eccèttera. Cose d’una gravità strema, palisate di fronte à una ascolta silenziosa di giurnalisti… Eppò, d’un colpu, l’omu si gira versu i tendoni culore d’oru daretu à ellu diciendu à pocu pressu què : « avete vistu sta sala, ùn hè ancu finita, ma sò belli ssi tendoni nò ? L’aghju sceltu eiu… Tuttu què hà da esse spettaculare… serà a più bella sala di ballu à u mondu… sentite u rimore di u travagliu ? Hè u più bellu sonu à u mondu. A prima donna ùn hè tantu cuntenta di stu rimore ma per mè hè magnìficu »… Umbeh !
Averà tuttu u so cerbellu u presidente di a prima putenza mundiale chì decide di a vita è di a morte di millioni di ghjente, di u dolu di famiglie americane, à tempu ch’ellu parla di tendoni è sala di ballu ? Pàrenu fole !
Ma ci hè quantunque una lògica in u so cerbellu. Hè statu criticatu assai per avè spesu 400 millioni di dòllari in piena crisa bugetaria… soldi offerti da imprese americane. Tutt’un ala di a Casa Bianca hè stata strutta per custruisce sta sala di ballu di 8000 metriquadrati è appacià l’egocentrìsimu di l’omu…
U regime dittatturiale di i Mollah hè criminale è terrurista, simu intesi. Deve finisce, simu intesi. Ma quantunque… a dicu ancu sè no a sapìamu, stu tippu hè veramente scemu ! •
• Leghje l’accapu di a settimana passata
