« Femu a Corsica saluta l’iniziativa, à a chjama d’Alain Nebbia è di Marcel Torracinta, merri di Lopigna è di Santa Reparata di Balagna, di strutturà un cullettivu di cumuni à favori di u statutu di residenti.
Parechji eletti di Femu a Corsica, frà i quali u nostru Sicretariu naziunali, François Martinetti, merri di u Pitrosu, ani participatu à a prima riunioni arimani, in Corti.
Issa dimarchja pulitica si scrivi in u filu d’una storia principiata 11 anni fà.
Di frivaghju di u 2014, nantu à una pruposta di u so merri Jean Biancucci è dopu à una deliberazioni di u so Cunsigliu municipali, Cutuli è Curtichjatu diventa a prima cumuna à aduttà u statutu di residenti, nanzu à u votu di l’Assemblea di Corsica (d’aprili di u 2014).
Altri cumuni di u Pumonti ani fattu a listessa scelta : Ortu, Ambiegna, Granacce, è Lopigna !
Malgradu a so annullazioni da a ghjustizia amministrativa, issi deliberazioni sò stati tappi impurtantissimi nantu à u chjassu di a rivindicazioni di u statutu di residenti.
Puru, a cumuna d’Alzu in u Boziu cuntinueghja à metta in opera issu dispusitivu in piazza dipoi u 2014, chì hà ghjuvatu di mudellu à a versioni nova vutata in Lopigna di sittembri scorsu.
Femu a Corsica si rallegra di issa mossa cumunali contru à a speculazioni, u spussessu è à prò di l’accessu à a prupietà pà i Corsi, chì rinvia à u drittu di u populu corsu à campà nantu à a so terra.
Dumani, cù a custituziunalizazioni di a leia particulari di i Corsi à a so terra, par via di u prughjettu di leghji custituziunali nantu à l’autunumia, s’apraranu dritti novi à u serviziu di u nostru populu.
U cumbattu cuntinueghja ! » •
Femu a Corsica, u 17 di lugliu 2026.
