Amicu di e prim’ore d’ARRITTI, Carlu Castellani hè statu durante anni è anni una piuma di u nostru settimanale. Hà scrittu parechji libri cunsacrati à a Corsica. Vicipresidente di l’Altu Cunsigliu di e Lingue di Francia è di u Cumitatu francese di u Scagnu aurupeu pè e lingue menu spaperse, hè statu dinù vicipresidente di u Cunsigliu di a Cultura, di l’Educazione è di u Quadru di Vita di a Corsica da 1984 à 1991.
Militente instanchèvule di a nostra lingua, sustegnu è purtavoce di Scola Corsa di Bastia è di parechji altri associ, hà scumbattutu parechji anni da chì a lingua corsa sìa integrata à a lege Deixonne.
Vene di publicà cù l’Edizioni Aedis « Mémoire des jours – Fatti è Detti » nant’à l’usi, e tradizioni, i fatti di stòria, di pulìtica, di cultura, i detti, e fole, e strufette, e filastroche chì còntanu ciò ch’ella hè a Corsica. U prò chì li hè fattu, o i culpacci, l’inghjustizie, e catastrofe ch’ella hà campatu.
365 ghjorni sò cusì sgranati unu appressu à l’altru, è ci dìcenu tutte e richezze di a nostra lingua è di a nostra cultura. L’ànima d’un pòpulu si conta
dinù cusì. Da sse stundarelle di vita, da ss’evenimenti tristi o allegri, da ssi sprichji di cultura custruiti à longu à i sèculi, da ssi fatti chì scrìvenu a storia, ssi detti, ssi pruverbii, sse date marcate da a nàscita d’un omu celebre, un pulìticu, un pueta, un Santu, un ghjurnale, un associu, un partitu,… Carlu Castellani, ci invita à un viaghju nant’à sèculi di storia. Hè un bellu travagliu di ricerca è di ramentu di a nostra memoria cullettiva. Una manera di ciuttà ind’è ciò chì fù u nostru passatu à traversu sse pàgine di storia è ciò ch’ella hè a nostra identità, à traverse ssi sprichji di lingua o di cultura.
À ringrazialu per sse strinte d’ochju à tanti pezzi di u nostru esse cullettivu ! Da leghje. •
