Perch’è a cultura è a lea suciale si custruìscenu inseme, l’associu Scopre vi aspetta numarosi
pè i so Scontri u 25, 26 è 27 di sittembre à a sala Maistrale di Marignana !
Site stati numarosi à a so ghjurnata aperta u 9 di sittembre scorsu, affaccàtevi torna sta dumenicata !
• Vènari u 25 à 9 ore : serata sinemà cù u documentariu Soundtrack to a Coup d’État, filmu francobelgoneerlandese, scrittu è realizatu da Johan Grimonprez, cù Patrice Lumumba, Louis Armstrong, Dizzy Gillespie… Jazz è sculunisazione s’intrèccianu, in core di a guerra fredda trà Stati Uniti è Urss è e brame di libertà in Àfrica…
• Sàbatu u 26 matina : à pàrtesi di 9 ore di mane, dopu à l’accolta di u merre Matteu Ceccaldi, è sott’à a presidenza di Patrick Ceruti Christian Lazzeri, prufessore emeritu di filusufia à l’Università di Paris-Nanterre (Sophiapol), prupone una cunferenza nant’à u tema : « Quachi ipòtesi nant’à l’orìgine di u Statu ». Pò, cù Gilles Martin, prufessore emeritu di Drittu à l’Università Côte d’Azur : « U Statu di drittu, figura minaccia di u Statu mudernu ».
À pàrtesi di 3 ora, André Peters, analistu-statistizianu di a Banca Naziunale di Belgica parlerà di « L’òrdine stituziunale di a dèbitta pùblica ». Pò Stéphane Haber, prufessore di filusufia à l’Università di Paris-Nanterre (Sophiapol) : « U Statu criminale. Definizioni è crìteri ». Infine Patrick Cerutti, prufessore di Lèttera superiore à u Liceu Jean Jaurès è Geoges Clémenceau di Reims : « Statu, autunumia, autarchia. U Statu cumerciale chjosu di Fichte ».
• Sàbatu u 26 à 9 ore di sera : u gruppu Quassù, cù Ceccè Pesce, Stèfanu Perfetti, José Ersa, tutti i trè autori, cumpunitori, interpreti anu da mette u focu !
• Dumènica u 27 : à pàrtesi di 10 ore, cunferenza cù Andria Fazi, maestru di cunferenza di Scienze pulìtiche à l’Università di Corsica : « Putenza è/o cunnivenza : dui sèculi è mezu d’autorità statale in Corsica ». Pò, Yahia Belaskri, anzianu giurnalista, scrivanu : « L’orìgine di u Statu algerianu mudernu ».
Eppò à longu à l’annata, l’associu Scopre vi prupone animazioni vàrie, serate sinemà, cuncerti… Dinù attelli d’infurmàtica, di teatru, di scrittura, di scalchi, di videò, di mariunette, di lingua corsa, di svegliu musicale, di disegnu, di pitture, d’impruvisate… •
Cuntatti è rinsignamenti : 06 21 04 21 77 | [email protected]
