Di Obama, u mondu avìa ritenu un mottu ch’hè firmatu in a storia cum’una sfida è una brama tamanta ch’hà vintu i cori americani : «yes we can »… iè chì pudemu ! Per Trump, cosa si ritenerà à tempu ch’ellu si alza à u più altu livellu di u mondu u novu presidente di i Stati Uniti d’Amèrica ? Forse una data tremenda, un 20 di ghjennaghju… U so mottu à ellu, hè un antra sfida, chì hà allucinatu millioni d’Americani : « you’re fired ! », Fora ! È omu si dumanda ancora cum’è hè statu pussìbule un scherzu sìmule ! Ci vole à ch’ella sìa veramente in gattiva salute a pianetta per ghjùnghjenne à ssi punti stremi ! Cosa seranu sti quattru annu à vene ?… Milliardariu, ultraliberale, omu di rete, Trump hè una caricatura cugnumata « Donald », per dì !…. Smaneratu, misoginu, è ancu « porcu » à certi mumenti, Trump hè un pruvucatore chì s’hè fattu cunnosce in Amèrica fendu show televisii. Prumutore immubiliaru, custruisce casamentoni è torre chì pòrtanu u so nome, scrittu sopr’à di manera smisurata cumu u so caràtteru. A più cunnisciuta hè a Trump Tower. Hè à capu dinù di casinò è mondu residenze di lussu, è si vende cum’una marca, cù vistiti, camisgie, caschette à u so nome. A so rièscita finanziaria face sunnià. Hè cusì in un mondu ch’ùn crede più tantu à a pulìtica è cerca à divertìscesi.
Malgradu a so grande classa, Obama ùn hà sappiutu risponde à l’attese di ss’Amèrica prufonda, cuchja è disingannata. A barakà, u successu, a lìccia di Trump sò e so carte maestre per cresce di manera subbitànie in pulìtica. Spunta in fin’di contu pè a prima volta durante à e primarie pè e presidenziale americane. U tippu hè un buisinessman è un omu di spetàculu chì sà ghjucà nant’à l’emuzioni di a ghjente, falla ride è disciulà nant’à tuttu incù pocu sèriu. Una star à a quale, cum’è tutte e star, omu perdona tuttu… Hè cusì ch’ellu serà ssu vènari 20 di ghjennaghju, u presidente di u statu u più putente di a pianetta ! In quantu à a so pulìtica, fora di e so cacciate sceme, nimu ùn sà à chì salza hà da cucinà. U so prugramma ? Ultraprutezziunìsimu è isulaziunìsimu, hà sputatu nant’à « u sistema ». Un colmu per un tippu chì s’appoghja nantu. Ma hè forte per buciardà. Trump hè un pupulista è cù u so scumportu caccia ciò ch’ella hà a voglia di stà à sente a ghjente: mandà à caternu l’establisment è a stampa chì l’appoghja, rinecà i sforzi da fà pè u climà, muccicà l’Auropa è i so dirigenti, riduce l’immigrazione, chjode e fruntiere cù u Mèssicu, fà a guerra à i dgiadisti… Avìa dettu durante à a campagna : «Ùn si pò batte u Statu islàmicu ? Vulete ride o chè ! Hà da cambià cù mè ! Sè sò elettu, avemu talmente vince chè vo n’averete una techja di vince ! »… U più stupente sò e so pusizioni prò rùssie per un Amèrica chì n’hà avutu sempre a paura. Poutine s’hè amusatu à ghjucà nant’à e so scimità per puntà a so candidatura, ma forse a rigretterà anch’ellu da quì à pocu… Avà, s’aspetta à vènari per stà à sente u so famosu discorsu d’intrunisazione. Attenti à e fette !
