U tribunale currezziunale di Marseglia hà creatu una ghjurisprudenza impurtante u 7 d’aprile contr’à u tràfficu di prudutti fittofarmaceutichi interdetti in Francia. Trèdeci prevenuti (trà personi è sucietà agrìcula di a Droma è di e Bocche di u Ronu) sò stati cundannati à chì d’avè furnitu ssi prudutti, à chì d’aveli utilizati trà 2018 è 2024. « Stu ghjudicamente hè una vittòria pè a prutezzione di l’ambiente è pè a salute » hà dettu u purtavoce di l’associu Générations Futures chì s’era custituitu partita civile. « Vole dì chì u tràfficu di pesticìdii interdetti hè cunsideratu cum’è una froda grava chì sprezza e règule messe in ballu per prutege l’ecosistemi è e populazioni. Generazione Futura si feliciteghja chì a ghjustizia àppia ricunnisciuta a gravità di sti fatti è a legitimità di a nostra azzione ».
« U tribunale hà ricunnisciutu a rispunsabilità penale è civile di tutti l’attori di ssi fatti illegali. E cundanne (prigiò è amende forte) indìtanu a realità di u preghjudiziu à l’ambiente è à l’interessi cullettivi chè no difendimu… dice à l’inseme di a prufessione chì sse pràtiche ùn sò accettèvule » hà dettu dinù l’avucatu di l’associu.
Trè tunnellate è mezu di prudutti periculosi sò stati ritruvati, ricunnisciuti cancarogeni, riprutòssichi, neurotòssichi, mutageni o disturbatori inducriniani, è cù false tichette per sbaglià quelli chì i cumpràvanu. « Per un dettu u metam sodium, un pruduttu assai periculosu, è assai tòssicu per l’acqua, pè a biodiversità » hà dettu Jean Luc Juthier di a Cunfederazione Paisana ch’era dinù partita civile. « Una di e più tòssica ch’hè stata ritruvata nant’à e trè spluttazioni di e Bocche di u Ronu, ghjè u moncozebe, una sustenza attiva interdetta in 2021 è chì hà grossi impatti intantu chè disturbatore inducrinianu » hà dinunziatu Judith Sebert, partita civile per l’associu France Nature Environnement.
Un intermediariu francese, recidivistu, cumprava i prudutti à a sucietà spagnola Agro Naqui è i rivendia à pruduttori agrìculi. Hè statu cundannatu à dui anni di prigiò frà i quali unu fermu (accumudèvule cù bracciettu eletrònicu), 100.000 àuri d’amenda frà i quali 50.000 attempati è l’interdizzione di travaglià ind’è l’agricultura durante 5 anni.
U tribunale hà cundannatu dinù parechje sucietà agrìcule è i so dirigenti à pacà amende da 10.000 sin’à 400.000 àuri, cundanne dinù di prigiò ferma o attempata, trà sei mesi à dui anni, è interdizzione di riceve suvvenzioni di a PAC (pulìtica agrìcula cumuna). Frà l’agricultori cundannati, ci sò i più grossi pruduttori d’insalate è di miloni in Francia, stallati in Saint-Etienne-du-Grès è in Arles.
Per piattà u tràfficu, certi prevenuti anu fattu false fatture per fà passà i pesticìdii cum’è ingrassi. U tribunale hà dinunziatu un sistema illegale è opacu fattu di disprezzu di e règule aurupee è francese, raprisentendu un rìsicu significativu pè a salute pùblica è per l’ambiente, un perìculu per quelli chì si ne ghjuvàvanu, pè i so salariati, pè a ghjente à l’ingiru, o pè i cunsummatori senza primurassi di l’impattu nant’à l’ambiente. « Cumprendu in piena cunfidenza st’insalate è altri frutta è legumi, eiu, voi, noi tutti simu in mira » avia dettu u precuratore.
Colmu di sta cundanna, parechji agricultori cundannati, avìanu spluttazione dette HVE (altu valore ambientale)… Di sicuru, criteri da rivede à u più in fùria per ssu labele…
Pè a so difesa i prevenuti anu fattu valè chì ssi prudutti èranu permessi in Spagna. Vale à dì quantu ci vole à mefidassi di i prudutti agrìculi spagnoli sparsi numarosi in Francia ! •
