A fiera di Bucugnà ferma per sempre u ricordu di l’ùltima di Natale Luciani. Si spenghjìa in un accidente di vittura à l’età di 54 anni allora ch’ellu s’incaminava pè a fiera à cantà. ARRITTI pensa à ellu, tutta a so làscita, è a disgrazia di a pèrdita di militenti di prima trinca cum’ellu era. Eccu l’umagiu di Femu a Corsica ch’ammenta ssu tristu anniversariu.
«U 7 di dicembri di u 2003, Natale Luciani si n’andaia à l’Eternu.
Militanti puliticu è culturali di prima trinca, pueta, cumpunitori, musicanti, cantadori, Natale Luciani raprisenta ciò chì u Riacquistu è a lotta naziunalista ani di più schiettu.
Da l’ARC à a Cuncolta, passendu pà u muvimentu clandestinu è a prighjò, nanzu di piglià u rinculu in i tempi foschi di u 1990, da « Canta u Populu corsu » à « A Scola di Cantu » chì porta oramai u so nomu, u parcorsu di Natale Luciani hè quiddu d’un omu sputicu chì hà cunsacratu a so vita à a difesa di a Corsica Nazioni, di u so Populu è à a tramandera à a so ghjuventù.
Più di 20 anni dopu à a so morti, Natale Luciani ferma un esempiu d’indiatura è di sincerità.
Femu a Corsica pensa oghji à a so moglia, i so figlioli, a so famiglia, è tutti i so cumpagni di cantu, di lotta è di vita.
In memoria ». •
