Simu digià à a sesta rientrata di Scola Corsa, a scola d’insignamentu immersivu assuciativu in lingua corsa. « Sei annata di custruzzione, di passione è di suddisfazione » dice u so presidente Ghjisepppu Turchini. Sta rientrata conta 260 elevi, è i primi zitelli à entre in CM1, cù a perspettiva vicina vicina di u cullegiu da creà !
Scola Corsa, ghjè dinù 38 impiegati trà i quali 19 insignanti, 17 animatrici, 2 amministrativi. Sò sei siti avale : Bastia, Biguglia, Sàrrula Carcupinu, Corti, Lucciana è l’apertura quist’annu di a prima scola in Fium’Orbu, in ambiante rurale, à a Serra di Fium’Orbu ! 8 posti sò cuntrattualizati è 5 altri sò stati prumessi in 2027. È a scola conta a prima laureata à u cuncorsu specìficu di u retale assuciativu immersivu !
Dice torna u presidente Turchini, « ci hè pròpiu da rallegracci da ciò chè n’emu acquistatu tutti inseme. In u nostru retale s’accerta ghjornu à ghjornu una pedagugia adatta, originale, chì si dimostra valida grazia à l’impegnu di e(i) nostre(i) maestre(i) è chì susciteghja un’adesione sucetale criscente. L’animatrici cullaburèghjanu cù l’insignanti da ottimizà u dispusitivu prupostu da a guarderia è a cantina sin’à l’attività perisculari. S’investìscenu i parenti cù generosità è efficacità è ci aiùtanu centinaie di mecenati, intraprese è particulari, rinfurzendu a nostra dimarchja. Ci sò sempre à latu, cù un sustegnu fidu, a Cullettività di Corsica è e merrie accuglienti »… Una bella rientrata dunque pè a scola d’insignamentu immersivu assuciativu Scola Corsa ! Ancu assai ch’ellu ci hè stata una bella mubilisazione di veranu scorsu. Hà permessu à l’Esecutivu di a Cullettività di Corsica, mandatu da tutti i gruppi di l’Assemblea di Corsica, di ripiglià i neguziati cù u Statu « da assigurà l’ingagiamentu di u finanziamentu previstu è l’ottenimentu d’una planificazione d’un sviluppu à long’andà, scritta in un quatru pluriannuale » spieca torna Ghjiseppu Turchini, rallegrèndusi : « più chè mai, preghèmuci una strada fiurita, nant’à i chjassi di l’amparera è di u spannamentu ».
Arritti augura forza è fiatu à Scola Corsa ! •
Pudete sustene l’associu, mandandu u vostru donu quì : https://www.scolacorsa.corsica/don/
