Sentu dì chì ci hè qualcosa, piattu cum’è un sicretu
Oghje in caserna di Bastia si rende onore discretu
Ùn si sente nunda in carrughju un vechju pienghje in u caffè
Deve avè qualchì ricordu, di u Centu Settanta Trè
Eramu in tempi neri di e più feroce battaglie
Quantu funu i ghjuvanotti à cascà sott’à e mitraglie
Paisani o citatini, Orsu Carlu o Dumè
Sott’à a listessa bandera di u Centu Settanta Trè
Aiò zitelli, hè più chè ora a libertà si ne spenghje
Ùn sintite i mughji fora, c’hè più d’una mamma chì pienghje
Ùn hè più tempu di dorme ma quellu di fassi valè
Noi figlioli di Cirnu, di u Centu Settanta Trè
*
O Signore sè tù i vedi quassù in lu to paradisu
Ùn hè mai troppu tardi per rende qualchì surisu
À l’eroi di nostra terra, Orsu Carlu o Dumè
’ssi zitelli morti in guerra, di u Centu Settanta Trè
Ognunu s’hè scappellatu è pò anu fattu un discorsu
U più cortu chì sìa fattu, mancu una parolla di corsu
Mute èranu e vechje trombe, andati Càrulu o Dumè
Ver’di e silenziose tombe di u Centu Settanta Trè
S’anu falatu a bandera, a s’anu piegata in trè
Un suldatu a s’hà purtata, cumu pudìa sapè
Ch’in celu pienghjìanu l’ombre di u Centu Settanta Trè
Ch’in celu pienghjìanu l’ombre di u Centu Settanta Trè.
Ghjuvan’Pàulu Poletti.
