L’8 di marzu, festa internaziunale di i diritti di a donna, hè statu francatu torna quist’annu. Quantu sò e donne ch’ùn u festighjeranu micca l’8 di marzu pròssimu ? In mancu trè mesi, sò una vintina in 2026 à avè persu a vita sott’à i colpi di u so cumpagnu. In u 2025, èranu 167. In 2023 141, in 2022 136. Vale à dì quant’elle sò in crèscita e viulenze contr’à e donne. Malgratu u Grenelle in 2022, malgratu e pulìtiche messe in ballu, malgratu un ghjornu dedicatu à i so dritti, a donna ferma marturiata in Francia è i so dritti sò sprezzati in u mondu sanu. Dapoi u 2022, u cullettivu NousToutes sparghje a so pròpia cuntabilisazione. Tombe da un membre di a so famiglia, o per avè ricusate un raportu sessuale o per vìa di a so transizione di gèneru, d’altre torna cundutte à u suicidiu, dice NousToutes : « vulemu prisentà e realità di e viulenze sessiste è sessuale chè no scumbattimu, senza discriminazione è cù a vuluntà d’ùn micca invisibilizà sse donne assassinate perchè èranu donne ».
NousToutes ùn hà micca fiduccia in u guvernu per cunnosce a rialità di sse viulenze. U Statu ùn conta chè e viulenze à u senu di u còppiu, vale à dì e viulenze cunghjugale, suvente cuntabilizate è minurite cum’è « drama familiale ». « Ùn face micca a sfarenza trà omicidiu è feminicidiu, postu chì a parulla feminicidiu ùn esiste micca in u còdice penale » si lamenta torna st’associu. Secondu ellu, st’ùltimi deci anni, 1.209 donne sò state assassinate perch’elle èranu donne.
142 forzatura o tentativa di forzatura sò state cummesse in 2026, dice un antru associu di difesa di e donne, sia un agressione tutte e duie minute. 94 % di ss’agressioni ùn anu micca sèguite ghjudiziarie. Hè dinù una viulenza tremenda. 2,6 milliardi d’àuri, sò i soldi chì màncanu per fà rinculà ss’agressioni sessuale, dice torna a Fundazione di e Donne chì finanza è prumove prugetti per sorte e donne di u so infernu.
Un raportu di i servizii di pulizza è di gendarmerìa dice avè cuntabilizatu in 2025 473.000 vìttime di viulenze fìsiche, frà e quale 114.500 èranu minori. 85 % di sse vìttime sò donne. Più di a metà sò viulenze in u quadru di a famiglia, vale à dì viulenze in u còppiu. Sse viulenze sò in crèscita di 5 % pè e viulenze fìsiche è di 8 % pè e viulenze sessuale. U raportu conta dinù 132.300 vìttime di viulenze sessuale, frà e quale 58 % vìttime minore. 95 % di i rispunsèvuli di e viulenze sessuale sò omi. Dinù pè e viulenze fìsiche, 80 % di i rispunsèvuli sò omi.
U 39 19, nùmaru di e donne vìttime di viulenze, hà rispostu à 108.142 chjame in 2025, vale à dì una crèscita di 7,8 % per raportu à u 2024. Hè a crèscita a più alta dapoi u 2020. 92 % di e chjame tuccàvanu e viulenze cunghjugale.
Parechje decine di manifestazioni sò state urganizate in Francia quist’annu da ch’omu rispetti i dritti di e donne. L’associ di difesa dumàndanu à u Statu un bugettu annuale di trè milliardi d’àuri da pudè luttà contr’à e viulenze fatte à e donne, è una lege quadru da pudè luttà cù mezi di pulizza è di ghjustizia efficaci.
È ùn si parla micca di e viulenze ch’accumpàgnanu ssi crìmini, inghjulie cutidiane, murale, finanziarie, pressioni nant’à a sorte di i cinnini da chì e donne fèrminu in a so prigiò… •
