Sei anni dopu à l’adduzzione di u Padduc, 50 anni dopu à e prime rivendicazioni pè a priservazione di a terra corsa, 35 anni dopu à a nàscita di u Cullettivu Lege Liturale, è 36 dopu à l’adopru, à l’unanimità, u 20 di dicembre 1985 di a lege liturale, dopu à multìpule cundanne torna, è prucedure chì indìtanu dapoi anni quant’elli sò for’di lege… hè incredìbule di vede u stòmacu di certi curnachjoni !… U Levante nant’à u so situ internet, conta l’esempiu in Coti Chjàvari di custruzzioni in bord’di l’acqua à u locu dettu Pozzacciu, nant’à a banda, micca di i 100 metri, ma di i 20 metri ! Di marzu 2005, prima verbalisazione di i gendarmi d’un risturante stallatu nant’à u liturale, in un spaziu rimarchèvule. Dui anni dopu, i gendarmi pòrtanu l’affare davant’à u procuratore. In 2008 verbalizèghjanu pè a terza volta chì u cuntravenente hà ingrandatu i lochi è l’hà cuperti di dui tetti di 44 è 135 metri quadrati ! A scutumìa ùn lu tomba micca, d’ottobre 2008 l’omu dumanda un permessu di custruì un piazzile in bord’di mare, senza puru parlà di u so risturante. Di nuvembre, u prefettu pumuntincu ricusa u permessu à nome di u Còdice di l’urbanìsimu, per vìa chì a dumanda si trova nant’à un spaziu rimarchèvule, fora di zona urbana è nant’à a banda di i 100 metri. U procuratore porta l’affare in ghjustizia. Puru, di ghjennaghju 2011, u nostru omu face un antra dumanda per « messa in cunfurmità per rinuvà à l’identicu una stazzona è una stalla à pàrtesi di ruvine è muri esistenti » (esistenza ch’ùn hè mai stata pruvata !). L’associ Le Garde è U Levante si custituìscenu partita civile. Di marzu 2012, u procuratore porta in ghjustizia currezziunale u cuntravenente per avè custruitu duie strutture di risturazione nant’à i 100 metri, fora di zona urbana, in un spaziu rimarchèvule. L’omu si difende u ghjornu di u prucessu cù un permessu zifratu u 3 di marzu 2011, da u prefettu Bouillon à a vigilia di a so partenza, allora chì e custruzzioni èranu già fatte ! Di ghjennaghju 2014, a Corte d’appellu u cundanna per avè custruitu senza permessu è in viulazione di e lege, ma ùn dà retta à a dumanda di l’associi di strughje sse custruzzioni. In u stessu tempu, di ghjennaghju 2011, u tippu avìa postu quattru permessi per custruisce dui paisoli in i lochi detti Saparella Sottana è Pozzacciu, è una struttura d’accolta nant’à u bord’di mare, un spaziu dettu incustruttìbule da a carte cumunale ! Puru, ssi quattru permessi sò accurdati da u prefettu Bouillon nanzu di parte, mutatu ch’ellu era à u ministeru di l’interiore ! Da sapè chì i so servizii di a DDTM s’èranu opposti à ssa dumanda… U merre s’appoghja nant’à l’avisu di u prefettu per dà i permessi. L’omu cuntentu cum’un pichju si mette sùbitu à custruisce uni pochi di bastimenti pè a splutazione turìstica, alberghi è risturazione. Sette sucietà sò create. L’associi scòprenu in 2012 durante à u prucessu l’esistenza di ssi permessi è di a regularisazione di u risturante già custruitu. Di nuvembre 2013, u tribunale amministrativu annulla i permessi di i paisoli dichjarati illegali. In 2015, a Corte d’appellu cunferma l’annullazione di i trè permessi. L’omu ne chjama à u Cunsigliu di Statu in 2016 chì ùn li dà micca retta. L’associi dumàndanu tandu a destruzzione di e custruzzioni. L’11 di marzu 2021, u tribunale d’Aiacciu ordonna a demulizione tutale di i lochi. L’omu si porta in Corte d’Appellu. U prucessu hè previstu di dicembre 2021.
Eccu ! Tuttu hè dettu. •
