![climat](https://arritti.corsica/wp-content/uploads/2021/04/climat-1-678x381.jpg)
A sò, n’avete una techja di vèdemi scrive nant’à u riscaldimentu climàticu è e so cunsequenze tremende per l’Umanità… puru aghju da cuntinuà perchè ci tocca à piglià cuscenza di a corsa scema ver di l’abissu induve anu ciuttatu l’omi. U Gruppu d’esperti trà guvernamenti nant’à l’evuluzione di u clima (GIEC) hà publicatu un antru raportu. A situazione s’hè torna impeghjurita. A dice ssu sestu raportu nant’à l’evuluzione di u clima. Oghje nimu ùn cuntesta più i raporti di u GIEC. Sò cunnisciuti pè u so sèriu spietatu. Ripìglianu in fatti tutti i stùdii è e cunniscenze scientìfiche nant’à l’evuluzione di u clima, vale à dì sta volta più di 14.000 stùdii esaminati da 234 esperti internaziunali è 195 guverni. Più di 78.000 avisi d’esperti è di guverni sò stati pigliati in contu. Tutti s’intèndenu nant’à e cunclusioni. Analizèghjanu tuttu di u funziunamentu di a terra è di l’impattu di l’attività umane. È e so anàlisi ùn sò ippòtesi, sò diventate certezze. Per via di tutti sti numarosi cunfronti di stùdii internaziunali, ma dinù per via d’infurmazioni oghje più cumplette. Nant’à a geulugìa di a terra per un dettu, oghje u GIEC dispone d’infurmazioni chì ricòllanu à 65 millioni d’annate, invece chì in l’annate 90, ùn ricullava chè à 5 millioni d’annate. U livellu di l’oceani oghje hè scrutatu da satelliti chì rèndenu l’infurmazioni più precise è più cumplette.
Allora cosa dice ssu sestu raportu ? Dice chì l’attività umane sò bè a càusa di tuttu stu ciambuttamentu. È tuttu stu scumpigliu, caldu tremendu, sicchina, piosse sceme, eccèttera hè u fattu di u riscaldimentu climàticu. Dice torna chì e cuncentrazione attuale di CO2 sò e più alte dapoi 2 millioni d’annate. E cuncentrazione di mettane da u fattu di l’energìe fussile, è di protozzidu d’azote ùn sò mai statu più alte dapoi 800.000 anni. Ogni decenniu a timperatura mediana hè più alta chì quella di u dicenniu antecedente. È quessa, dapoi u 1800 ! I fattori naturale ùn ghjùnghjenu à spiecà a rapidità è l’intensità di u riscaldimentu climàticu. A respunsabilità umana ùn pò più esse nigata ! U raportu travaglia nant’à parechji scenarii. Tutti danu freddu ind’è l’osse. Certi scambiamenti pruvucati sò oghje irreversìbili, cum’è a strughjitura di i ghjacci, l’altezza di e timperature è di u livellu di u mare, l’acifidazione di l’ocenani. L’intensità di ssi ciambuttamenti dipende direttamente di l’emissioni di CO2. Più si riscalda a terra, è più u rìsicu di vede smarisce a furesta amazuniana, o strùghjesi a calotta ghjacciara. Firmà à una crèscita di 1,5 gradi hè sempre pussìbule ma chere sforzi tamanti. Disgraziosamente a prubabilità di francà una crèscita di 2 gradi hè di 80 %. Basta a vede l’esempiu francese, u guvernu hè firmatu à un scopu di riduce di 40 % e so emissioni da quì à 2030, allora chì a situazione cummanda un’obbiettivu d’omancu 55 % di reduzzione ! I settori i più pulluanti in Francia sò sempre aiutati da suvvenzioni statale ! Per quessa chì urganìsimi cum’è « u nostru affare à tutti » anu purtatu lagnanza contr’à u Statu francese. È anu vintu in ghjustizia ! Ma a Francia ùn cambia di versu. Ci porta in un mondu prufundamente ciambuttatu, cù zone sane ch’anu da divente invivèvule. U raportu dice dinù quantu e pupulazione e più dèbule seranu dinù e più tocche da sse cunsequenze tremende, aghjustendu l’inghjustizia suciale à a catastrofa ambientale. Simu lechi. •