ὅπου φτύσουν πολλοὶ, γίνεται πηγάδι
(Opou phtusoun polloi, ginetai pègadi)
Induve stupa assai mondu, nasce un pozzu
Salute à tutti. St’ètima parleremu di der Brunnen. « Avà, mette à parlà tedescu issa sciocca ! » Scùsammi, vulia dì pou. « Cosa hè st’affare, pou hè catalanu, scimisci o chene ? » Ùn fà casu, sò stanca. Nò, a vera parolla hè poço. « Và bè, u purtughese… Aghju induvinatu : si trattarà di u pozzu ». Iè, ai pròpiu raggiò, u pozzu.
O Dumè t’arricordi quellu pozzu di Muru ? « Iè, porti li to sess… Nò, tocca à mè à sbagliammi. Allora, u fattu si stà chì, da chjuchi, l’acqua mancava in casa d’estate è tuttu u paese andava à u pozzu à lavassi. » Micca tutti, o certi muschi naturali ! S’affacàvanu e mosche à fà pranzu, s’affacàvanu. « Dice u pruverbiu : induv’ellu ci hè statu un pozzu, ci stà sempre una guazzina. »
Pozzu t’hà parechje accezzioni : eccu a definizione di l’Infcor : “Ciottu prufondu, pè u più verticale è di sezzione circulare, scavatu in terra, è rivestutu di muratura per raccoglie l’acqua sutterania. – Piccula cavità naturale o artifiziale pocu prufonda piena d’acqua : mette i pedi in u pozzu. – Estens. Onda in un fiume ; vasca murata per ritene l’acqua. – Mare : francà u pozzu.”
Vene a parolla da u latinu puteus chì u significatu hè « tufone, pozzu ». Sò stati scuparti pozzi assai anziani : in Cipru, si tròvanu pozzi tònduli cimentati datati di u Calcolìticu. In Auropa, i pozzi di u Neulìticu èranu fatti di legne.
Sò famosi i pozzi antichi di Pompei : postu chì e fonti di l’antichità assumàvanu spessu un caràtteru sacru, e murature t’avìanu un aspettu artìsticu è decurativu speciale, tale u puteale del’Foro Triangolare (cf. ritrattu). « Mi face pinsà à a surghjente d’Orezza ! » Iè, si pò dì.
Mentre l’altu medievu, i pozzi sò numarosi postu chì l’acquedutti sò distrutti. Sò sempre l’occasione d’un adurnamentu architteturale, cum’è u pozzu di schema cùbicu di u palazzo della Frescada a San Tomà chì ricolla à l’VIIIu sèculu. Più tardi, cù a crèscita di l’acquedotti è u gustu pè e funtane, sò più scarsi i pozzi.
T’anu una piazza impurtantìssima i pozzi ind’i deserti, postu chì ghjè ingiru à elli chì s’addunìscenu i caravinieri.
Ci vole à mintuvà quantunque chì hè periculosu assai di fallà ind’un pozzu : si pò truvà monossidu di carbone. Hè da quessa chì i prufessiunali scèndenu cù una candella : s’ella si spegne ghjè chì ùn ci hè più ossigenu. •
