A Guadeluppa è a Martinica sò in rivolta dapoi parechje settimane. Parte francese omu disciuleghja contr’à a viulenza è i saccheghji… ma parte di ss’ìsule, nè l’eletti, nè i sindicati ùn vòlenu cundannà e viulenze di pettu à l’inghjustizie tamante ch’elli sòffrenu i so pòpuli. U muvimentu di zerga hè natu da l’ubligazione di vaccinazione di pettu à a crisa sanitaria, vale à dì a sfiduccia di ssi territorii contr’à u Statu francese, e bugìe è e spluttazioni ch’elli pàtenu e so pupulazioni dapoi sempre. U Statu francese impone, u Statu francese reprima, u Statu francese cundanna… è face sèculi ch’ella duri ! I guadeluppeani cum’è i martinichesi n’anu una techja di ssi cumpurtamenti, ùn ci hè più fiduccia nè tuttu ciò chì vene da Parigi è e so andature paternaliste. Invece di dialogu, a Francia manda e so forze di pulizza, GIGN è RAID di pettu à prublemi prufondi chì esìstenu da sempre. A viulenza hè addisperu bellu troppu suvente. U sottusviluppu, a vita cara, u mancu d’infrastrutture, a murtalità di i zitelli, a disuccupazione, u fiascu sculare, l’accessu à l’acqua putàbile, u disprezzu, l’ingannu… i territorii ultramarini sòffrenu di a luntanezza micca solu geugràfica, ma dinù ecunòmica, suciale, culturale. Quasi 35 % di a pupulazione campa sott’à u livellu di puvertà. Ssi pòpuli ùn anu nunda à chì vede cù e brame parigine. Vòlenu amministrassi da per elli è e parulle di u ministru di l’Oltremari nant’à a so pussìbule autunumìa tradùcenu un evidenza. Micca per sbarrazzàssine, ma per dalli i mezi per règesi, sviluppassi, è custruisce dinù novi raporti di cuuperazione è di scàmbiu cù Parigi. Vale à dì rilazioni numale. Cum’elle duverìanu esiste in u mondu sanu. A Francia ferma un scarsu paese à oppònesi. A crisa ùn hè solu sanitaria dunque, hè ecunòmica, suciale, sucietale, identitaria. Sè in Francia u livellu di a vaccinazione hè di quasi 90 %, in Guadeluppa hè di 36 %, è di 39 % in Martinica. E pupulazione ùn vòlenu di l’ubligazione di vaccinazione per vìa di u scàndalu à u clordecone chì lascia gattivi ricordi in a memoria pupulare. Ùn crèdenu micca à l’efficacità di u vaccinu chì face più paura chì a malatìa ch’ellu dice cumbatte. Ind’è l’annate 80, u clordecone hè statu sparsu di manera larga per luttà contr’à u pinzachju di u bananieru. Hè un pesticidiu tremendu ch’hà arruinatu a vita di millaie di guadeluppeani è martinichesi. Ùn si strughje micca è hà impuzzichitu l’ambiente per sèculi è sèculi. Hè per quessa ch’ellu hè statu interdettu ind’è l’annate 70 in parechji paesi. Ma micca in Francia. Puru si sapìa quant’ellu era periculosu per l’omu, pè u cerbellu, u fècatu, a fertilità… Hè un pruduttu ricunisciutu cum’è cancherognu. Sapendu què, si capisce chè ricusà u vaccinu hè una forma di resistenza per Guadeluppeani è Martinichesi, chì si sentenu abbandunati è disperezzati da u guvernu. Sulidarità cù a Guadeluppa è a Martinica, è tutti i paesi marturiati da l’attitùdine culuniale di Parigi ! •