Sè vo pinsate chì a Corsica si trova in cor’di Meditterràniu, vi tocca à stà à sente à Eppò !
Eccu un gruppu ch’hà a so uriginalità, arradicatu in a tradizione pulifònica nustrale, pregnata di cultura meditterrània cù accenti cunditi ch’indìtanu una stòria mischiu di culture è mùsiche à tempu tradiziunale è creative ! Eppò va à circà a pena di più luntanu chì a mùsica tradiziunale corsa, tuttu essendu imbuttacita di ciò chì face l’uriginalità di a nostra cultura.
Sò cusì cinque musicanti bastiacci, Ànghjulu Torre, Francescu Spinelli, Petru Veyrat Tristani, Ànghjulu Bianchini è Ghjuvan’Filippu Graziani ; cù parcorsi artìstichi anziani chì si pròvanu cusì à un prugettu musicale induve ugnunu porta qualcusella è vi porta in viaghju senza alluntanassi veradimente di e nostre sponde. Ùn era sèmplice a scumessa ! Cusì Eppò ci rigala deci tìtuli chì festighjèghjanu Meditterràniu cù a fiertà è a libertà chì l’accumpàgnanu ! Certi canti sò ancu messi in scena nant’à clip video uriginali è anch’elli viaghjatori.
Frà ssi tìtuli, Terra Nova parla à i Bastiacci è u s’amore di a so cità, invitènduli à spassighjà trà mezu à i carrughji, a stòria è quelli chì l’anu fatta. Bolero per tè rende umagiu à e donne, figliole è surelle. Costantinu chjama à a cumpetizione in a sedduzzione. Core timpesta, Eppò o A Zinzalesca invìtanu à cantà è a ballà cù elli ! Sò magnìfiche creazioni culurite è carche di ricerca uriginale ch’invìtanu à a festa è à a spartera. Andate pò à scòpreli ! •