Certi a dìcenu digià, « hè u primu partitu di Francia ». Ma ùn si sprima micca. È quessa fracicheghja assai a leghjittimità di tutti l’eletti à tutti i scrutini, da principià cù e presidenziale. Nant’à 48 millioni 752 milla è 339 scritti, sò 13.655.861 personi chì sò firmate in casa soia (28,01 %). S’omu aghjusta i voti bianchi (4,58 %) è i voti nulli (1,65 %), sò 34,24 % urfanelli di a so scelta per l’elezzione maestra d’un paese, a presidenziale ! Emmanuel Macron hè statu elettu cù solu 18 millioni 768 milla è 639 voti. Hè pocchìssimu.
À e Legislative, vale à dì quelle è quelli chì fàcenu a lege, vale à dì torna quelle è quelli chì pèsanu nant’à u nostru destinu, annant’à quasi 48,6 millioni scritti, 26 millioni 125 milla è 321 elettori ùn sò micca andati à vutà. Vale à dì 53,77 % ! S’omu aghjusta u millione è 239 milla 907 personi ch’anu vutatu biancu (2,55 %) è i 477.308 personi ch’anu vutatu nullu (0,98 %), face quantunque 27 millioni 842 milla è 536 personi ch’ùn sapìanu quale sceglie. Umbeh !… Và male u paese di i diritti di l’Omu ! A maghjurità di a cinquèsima putenza mundiale (i voti Ensemble !), pesa 8.002.407 personi… A Nupes di Mélanchon chì mughje « vittoria ! » pesa 6.555.984 elettori, nant’à 48.589.606 millioni di scritti. U RN di Le Pen chì mostra i so mùsculi è pratende à a vicepresidenza di l’Assemblea naziunale o a presidenza di a putente cummissione di e Finanze, pesa 3.589.269 elettori. Tuttu què deve chjamà tutt’ugnunu à un pocu di più umilità è inchietùdine. I mèdia diciulèghjanu nant’à i « grandi vincitore » quì, « u fiascu » quallà… di sicuru… hè forse una verità di ssu scrutinu, ma micca tutt’à fattu. Pàrlanu di l’astenzione maiò, ma trà percentuali è tendenze, ùn pare micca una catastrofa à a ghjente chì stà à sente à a televisiò. Invece chì i sciffri, elli, schìzzanu à l’ochji. L’elettore francese hè stumacatu di pulìtica è ùn ghjunghje più à sprìmesi.
In Corsica, ùn simu micca megliu. Nant’à 243.000 scritti, sò 95.098 ch’ùn sò micca andati à vutà à e presidenziale, è cù i bianchi è i nulli, sò 109.184 à ùn avè sprimatu un votu ! Peghju torna à e Legislative ! Nant’à 243.539 scritti, sò 132.704 personi ch’ùn sò micca andate à vutà ! Sìa 54,48 %. È s’omu conta dinù i bianchi è nulli, sò 139.555 personi ch’ùn sapìanu chì fà ssu 19 di ghjugnu, sìa 57,30 % di i scritti. È quantu ùn sò mancu scritti ? Sarebbe ora di fassi penseru di stu prublema di demucrazìa. Per vìa di l’astenzione maiò certi deputati sò stati eletti cù menu di 10 % di i scritti, scrivìa u ghjurnale Le Monde stu 20 di ghjugnu. U percentuale u più forte hè in e circuscrizzione di a Seine-Saint-Denis (vi stona ?) cù 77,09 % (11a circuscrizzione) è 74,99 % (4a). Popopo poooo ! In e circuscrizzione di u stranieru si tocca più di 80 % d’astenzione (86,06 % in l’8a circuscrizzione, 83,71 % in a seconda è 81,88 % in a novèsima). Dice torna Le Monde, si conta in Francia 417 circuscrizzioni nant’à e 577 induve menu d’un elettore nant’à dui s’hè spiazzatu per vutà : « i deputati eletti in 2022 ùn sò chè 37, sìa 6,5 %, à raprisentà più di 30 % di l’elettori scritti in a so circuscrizzione. L’immensa maghjurità (479 sìa 83 %) raprisèntanu trà 20 è 30 % di i scritti, 58 trà 10 è 20 % è 3 deputati sò ancu sottu à ssu livellu. » Tristu custatu. •