![golden gate 1](https://arritti.corsica/wp-content/uploads/2017/02/golden-gate-1-678x381.png)
Àrombu di decreti è di tweet scemi, u Donald Trump sbalurdisce l’Amèrica in i so valori fundimentale…
Si multiplichèghjanu e manifestazioni, sprìmenu u so stumacheghju e persunalità e più rispettate, s’àlzanu ghjùdici per parà e so decisioni, è pròvanu ancu i scientìfichi à priservà u paese di un « narsissicu periculosu ». Sò cusì millaie di duttori à ziffrà una petizione per dì chì u novu presidente ùn hè capace di rege l’Amèrica… chjìbba saetta ! Frà e reazzioni chì si fàcenu sente, une poche di cità si ribèllanu anch’elle. Frà elle, San Francisco. U 23 di nuvembre scorsu, nanzu l’invistitura stessa di Trump, a cità califurniana s’hè upposta à u so prugramma aduprendu una dichjarazione sulenne per fà sapè ch’ella entrìa in resistenza. Dice ssa dichjarazione chì San Francisco firmerà una « cità santuaria »:
« ùn gireremu micca u spinu à l’omi è e donne uriginàrie d’altri paesi chì partecipèghjanu à a grandezza di a cità chì raprisentèghjanu più d’un terzu di a pupulazione. Ci hè quì ind’è noi u Golden Gate : custruimu i ponti, micca i muri » dice a risuluzione. È a sèguita hè di stessa andatura : « ùn riveneremu mai nant’à i diritti di e donne, ch’ella sìa in u duminiu di a salute, di u travagliu o qualsìasi altru duminiu minacciatu da un omu chì tratta e donne cumè ostàculu à avilisce o ogetti à inghjuglià ».
«Avemu principiatu, dice torna San Francisco, à accoglie 12 anni fà i matrimonii omosessuali, ùn avemu micca da piantà oghje, è per tutte sse personi chì si sèntenu impaurite, intimurite o sole : sàpiate chè vo cuntate. Site viste è site amate, è San Francisco ùn pianterà mai di scumbatte per voi… Credimu in u principe fundimentale di libertà religiosa di questa nazione. Ùn sbandimu à nimu pè a so fede. È e sole liste chè no tenimu sò quelle di l’inviti à pricà inseme… A vita di e personi di culori conta in San Francisco, ancu sè ùn hè micca u casu à a Casa Bianca ».
Dice torna ssa dichjarazione :
« u cambiamentu climàticu ùn hè bugìa o cumplottu di i Chinesi. Ind’è a nostra cità circundata da l’acqua nant’à trè lati, a scienza hè impurtante è cuntinueremu u nostru travagliu nant’à l’energìa pulita, u zeru frazu, è tuttu ciò chè no femu per prutege e generazioni à vene ». Infine si ribella per vìa di l’annulazione di l’assicuranza malatia, o di u finanziamentu di u trasportu in cumunu o u fattu di chjode e fruntiere di l’Amèrica, è cunclude : «Cundannemu tutti i crìmini è i discorsi d’odiu… (Trump) ùn pò cambià ciò chè no simu, ùn cambierà mai i nostri valori… Lutteremu contr’à a discriminazione è l’irrispunsabilità. Simu una cità è avvanzeremu tutti inseme ».
New York, Chicago, Boston, Los Angeles, Berkeley, Oakland si sò anch’elle dichjarate « cità santuarie » inzerghendu u presidente di i Stati Uniti ch’hà zifratu un antru decretu minacciendu di tagliali e risorze. Tandu, San Francisco s’hè vultata purtandu lagnanza contr’à ellu : « Ssu decretu ùn hè solu anticustituziunale, hè antiamericanu. Per quessa duvemu alzassi è vultassi… Simu un paese d’imigrati è una terra di drittu. Simu i guardiani di a nostra demucrazìa ».
Forza Amèrica !
Fabiana Giovannini.