Stu 29 d’ottobre, una grande manifestazione era urganizata à Sainte-Soline in e Duie Sevre. Dopu à a chjama di 150 urganisazioni. 6000 personi si sò adunite per dì innò à megabacile di ritenuta d’acqua per l’agricultori. L’interdizzioni prefetturale è e bombe lacrimose ùn sò ghjunte à frinà a determinazione di sti difensori di l’ambiente pè u sviluppu d’una agricultura durèvule.
Si puderebbe pensà ch’ella hè una bona sta riserva d’acqua ma i difensori di l’ambiente ci vèdenu à u cuntrariu u sìmbulu d’una agricultura intensiva è sragiunèvule. Si multiplichèghjanu in Francia ste bacile di più in più maiò. In e Duie Sevre, sò sèdeci in prugettu, e prime dèvenu cuntene 400.000 metricubi d’acqua, vale à dì 160 pissine olìmpiche, è a più grande accuglierà 680.000 metricubi ! Per èmpiele, s’agisce di pumpà l’acqua di e stese freàtiche d’inguernu, ciambuttendu u cìculu di l’acqua. U Cullettivu contr’à e bacile dinunzia u rìsicu d’assiccamentu di i fiumi è fiumicelli, già tocchi da e sicchine l’estate è e calate di e stese d’acque sottuterra. Per l’eculugisti, hè un aberrazione di ritene l’acqua cusì, allora ch’ella era naturalmente sottutera è prutetta da i fenòmeni d’evapurazione. L’estate, sin’à 50 % di l’acqua disopra si svapureghja per vìa di u caldu. Pumpà l’acqua ritenuta à u frescu sottuterra, à chì ghjova ? Spessu, ùn ci hè nisun stùdiu nant’à l’impattu ambientale di sta pràtica. « Ind’i tempi, l’anziani scavàvanu u so terrenu per truvà l’acqua è annacquà e so culture o dà à beie à u bestiame », dìcenu l’agricultori di a Fnsea (Federazione naziunale di i sindicati di e splutazioni agrìcule). Ma què ghjera « in i tempi » ghjust’à puntu. Oghje l’acqua hè diventata un prublema maiò. E stese sottuterra càlanu già naturalmente, è sò pulluate da i pesticidii. Ùn neve più l’inguernu, si strù-ghjenu i ghjacciaghji, u cìculu di l’acqua hè ciambuttatu. L’acqua ùn hè più gràtisi, si paca perch’è si deve sparte. L’agricultori ùn sò micca tutti d’accunsentu cù ste bacile ch’ùn prufìtanu ch’à una minurità frà elli, chì s’accapparèghjanu u bè di tutti. U colmu hè chì ss’agricultori sò più industriali chè agricultori, è tòccanu suvvenzioni pùbliche ! E bacile sò suvvenziunate à 70 % da l’Agenzia di l’acqua in Loire-Brittagna. S’agisce di decine di millioni di suvvenzioni agrìcule cunfiscate. Ùn sarebbe megliu di mette sti soldi à u prufittu d’un agricultura durèvule ?
A Cunfederazione paisana vole ch’ellì sìppianu aiutati l’agricultori virtuosi ch’anu pràtiche di pruvista d’acqua più rispettose di l’ambiente è di u bè cumunu. « Sti megabacile sò ultrasuvvenziunate, ci vole à dà sti soldi à pulìtiche chì scàmbianu e pràtiche agrìcule cù sistema d’irrigazione ecunome in acqua à u serviziu di tutti i paisani, dice torna a Cunfederazione paisana. Di pettu à i ciambuttamenti climàtichi, ci tocca à ripensà e nostre pràtiche agrìcule. Ci vole à favurizà l’infiltrazione di l’acqua. Da quì à u 2050, u livellu di e stese d’acqua sottuterra hà da sminuisce di 30 à 50 % in u Sud Ueste. Ci vole à cambià di versu ! Chjamemu l’autorità à apre demucraticamente a quistione di a spartera di l’acqua. Dinù l’accunciamentu di u territoriu, piantendu l’artificialisazione di e terre chì ghjè una càusa maiò di u scurrimentu di l’acqua. »
Parule di bon’sensu. •