Parechje iniziative sò prese pè a Festa di a Nazione 2022. Eccu quì un rammentu di qualchi appuntamentu. Bona Festa di a Nazione à tutti !
In Bastia
In u quadru di A Festa di a Lingua, Bastia vi prupone un cuncertu eccezziunale nant’à u tema di a diversità linguìstica cù Anaiak Gara è Simu Fratelli à u Centru Culturale l’Alb’oru, à pàrtesi di 8 ore è mezu di sera, l’artisti corsi è baschi v’invìtanu à un mumentu di spartera è d’allegrìa.
In Biguglia
Principia u mercatu di Natale, è u Spaziu Culturale Carlu Rocchi è RCFM v’invìtanu à u spetàculu « Un ghjornu una canzona » di Marc’Andrìa Castellani, à 8 ore è mezu di sera. Ssu spetaculone hè statu una bella rièscita. U scopu hè di ripruduce l’emissione di Marcu Andrìa Castellani, cù 13 canzone scelte cuntate in u cuntestu induv’elle sò state create. Saranu presenti Felì, Antone Marielli, Jean Vincent Servetto, Petru Bracci… cù un urchestru appostu creatu pè a serata. U spetàculu serà diffusatu nant’à RCFM a sera di Natale, allora affaccàtevi è sciaccammanate !
In Lìsula
Cum’è tutti l’anni, u Cumitatu Lisulanu v’invita à festighjà a Nazione cù a participazione quist’annu di a ghjuventù indipendentista, canti nustrali, chjami è rispondi, animazione da Francè. Un umagiu serà resu à u militante Yvan Colonna. Ci serà da beie è da manghjà.
In Corti
Un spetàculu sanu sanu in lingua corsa, mischiendu stòria, arte, puesìa, cantu, ballu, slam, videò… in l’onore di l’Università è di tutti quelli chì anu scumbattutu per àprela dapoi u 1730. Spetàculu creatu cù a Mission Créativité, Scrittu, messu in scena è curegrafiatu da Davia Benedetti, cù accunciamenti di Alinu di Meglio, è a partecipazione di Patrizia Gattaceca, Ghjuvan’Petru Giudicelli, è parechji altri artisti.
In Luri
Messa à a cappella di l’Immacculata Cuncezzione à 11 ore è mezu, pò pranzu. À 5 ore è mezu dopu meziornu, cunferenza di Jean Castela « Storia è lochi di memoria di a Corsica suvrana à u XVIIIu sèculu » à a sala pulivalente (A Piazza). 8 ore di sera : Cuncertu di u gruppu Luna Dea (José Ersa, Cléo è Antone Marielli). Si compia cù apperitivu è cena.
In Purtivechju
À 5 ore dopu meziornu, cunferenza nant’à a tuppunimìa, « I nosci loca » cù Francescu Maria Luneschi di l’Università Pasquale Paoli. À 6 ore, messa cantata in a ghjesgia di l’Immacculata Cuncezzione, pò prucessione infiacculata in a Cità, è festa nant’à a piazza Giraud, cù vitellu arrustitu offertu da a municipalità, è cuncertu di u gruppu Eppò à pàrtesi di 8 ore è mezu. A ricettta di a serata serà à u prufittu di e scole pè i so prugetti à favore di a lingua corsa.
In Vulpajola
Una cunferenza nant’à a nostra stòria, cù Paulu Turchini Duriani à a sala di e feste di u paese à 3 ore dopu meziornu. Una messa à 5 ore in a ghjesgia di Vulpajola è un pranzu à 7 ore di sera à a sala di e feste di u paese, cù figatelli, coste, vinu… (prezzu 15 €, gràtisi pè i zitelli di menu di 10 anni).
In Parigi
Una messa serà detta u 7 di dicembre à 7 ore di sera in presenza di u Vescu di Corsica, Francescu Bustillo, à a ghjesgia Sainte Odile, 2 avenue Stéphane Mallarmé, 75017 Paris. À 8 ore, un pranzu in a critta di Sainte Odile (partecipazione 20 €) cù u gruppu musicale Sarocchi. •