Cosa ci purghjerà 2023 ? È Natale, ghjunghjerà à dacci un pocu di gioia è rifiatu ? 2022 hè statu tristu è tremendu, pè a Corsica, per l’Auropa è per l’Umanità.
A pianetta s’hè torna riscaldata. 2022 hè stata l’annata a più calda in Francia. Cum’ella era stata già 2021 annu, è 2020 dui anni fà… Basta à fighjà l’evuluzioni di e timperature dapoi u 1900 è u prugressu industriale, per capisce chì simu ind’un rùfulu di più in più putente ch’omu ùn parvene à piantà. Ùn ci hè nisun speranza di vede 2023 migliurà sta tendenza spaventèvule. L’uragani in Amèrica, a sicchina è e timpeste in Auropa, in China, in Ìndia, à u Pachistanu, l’inundazioni in Australìa è in Àfrica di u Sud, u sfundamentu di i ghjacciaghji, l’incèndii maiò, i grandi fiumi à seccu… più a natura ci parla, menu stemu à sente. O Dìu, aiutàteci ! Dàteci un pocu più sumerinu…
In Francia è in Auropa, u fattu u più tremendu di u 2022 hè ghjuntu d’Ucràina è di e bombe di Poutine. A guerra in Auropa ùn ci era più dapoi 77 anni s’omu schiva i Balchani ind’è l’annate 90. Terza guerra mundiale, perìculu nucleariu, esiliu, scumpienti… a paura s’hè sparsa in Auropa è tutt’ognunu ci hà vistu u peghju di l’Umanità trà e minaccie è e realità d’una guerra ch’ùn risparmia e pupulazioni civile. L’Ucràina soffre malgratu l’aiutu di l’Auropa è di l’Amèrica, mòrenu donne è zitelli, sò scarse acqua è elettricità à l’orlu di u freddu d’inguernu, decine di millaie di sullati sò morti da parte è manca, senza parlà di i feriti è struppiati pè a vita. È u mondu sanu hè surpresu da a resistenza di ssu pòpulu curagiosu. A Russìa soffre anch’ella ma ùn si ne parla, fora di cuntà u nùmaru incalculèvule di e sanzioni chì mena u so pòpulu ingannatu da e bucìe di Poutine. Cumu finiscerà sta guerra ? 2023 ci purterà a pace ?
Ind’è noi, l’agressione bruttaccia è barbara contr’à Yvan Colonna, pò a so morte dopu à avè luttatu trè settimane in u so lettu d’uspidale, hà marcatu a Corsica, inzerghitu a ghjuventù, scuzzulatu u guvernu. E prumesse d’autunumìa, u ritornu di Petru Alessandri è Alinu Ferrandi, anu calmatu un pocu u pòpulu eppò, cum’è sempre ind’è a stòria corsa, nunda hè cambiatu. Si puderà sempre parlà di « discussione cù u Statu » è « d’autunumìa » in 2023 ?
Brame n’avìamu à rivoccu… invece, 2022 hè stata gattiva assai. Bramemu chì 2023 ci porghje un pocu di rifiatu è speranze d’avvene. Aspettendu, cari lettori, chè vo trùvate gioia è pace in a notte di Natale è di ssu bambinu natu. Prufittate di i vostri in famiglia, purghjite a manu à i più dèbbuli. Aiutèmuci chì a sulidarità trà noi ci darà forza è fiatu.
Bon Natale à tutti ! Bon Capu d’Annu, Pace è Salute à voi è à tutti i vostri cari ! •
