Ind’è a nuttata di dumènica u 5 à luni u 6 di ferraghju, in Gujan-Mestras, dipartimentu di a Gironda, una donna d’una quarantina d’anni hè stata tomba à pistulettata da u so cumpagnu di vita in casa ind’è elli. L’omu dopu s’hè tombu.
U 2 di ferraghju, Marie Camille, 38 anni, hè stata tomba anch’ella da u so cumpagnu à pistulettate in Gros-Morne in Martinica. Traspurtata in urgenza assuluta cù parechje palle in corpu è ind’u spinu, a corcia donna s’hè morta pocu tempu dopu à esse ghjunta à l’uspidale.
Sàbatu u 28 di ghjennaghju in Limoges, Magdalena, 29 anni, hè stata assassinata in casa soia, torna à pistulettate, da u so cumpagnu di 36 anni. Ellu parla d’un accidente.
U 27 di ghjennaghju, Mongia, 73 anni, hè stata minata à morte cù una cazzarola da u so cumpagnu di 78 anni in Saint-Etienne-du-Rouvray ind’è a Seine-Maritime. S’hè resu dopu à a pulizza.
Màrcuri u 25 di ghjennaghju in Salles-du-Gardon, Sihem Belouahmia, 18 anni, hè stata assuffucata da un omu di 40 anni dopu à una lètica. Cusì dice ellu, palisendu ch’elli èranu inseme, ma a famiglia di a ghjuvanotta dice ch’ùn hè vera, ùn èranu micca inseme. Sihem era smarita dapoi u 25 di ghjennaghju vicinu à a so casa. L’omu l’avìa tumbata u ghjornu stessu pò avìa piattatu a so salma ch’hè stata ritruvata u 2 di ferraghju. L’omu era cunnisciutu cum’è periculosu da a pulizza. Serà piuttostu un crìmine chè una viulenza ind’un coppiu. Ma per avà u Cullettivu contr’à i feminicidii l’hà cuntabilizatu.
U 24 di ghjennaghju, in Digne-les-Bains (Alpes de Hautes-Provence), ghjè Manon, 22 anni, ch’hè stata tomba da u so cumpagnu di 23 anni. S’hè tombu ancu ellu dopu.
Marti u 24 di ghjennaghju, Eva, 20 anni, hè stata tomba in a so casa da una fucilata da u so cumpagnu di 20 ans. Ellu hà pruvatu dopu à scappà ma hè statu chjappatu da a pulizza.
Ind’è a nuttata di u 24 à u 25 di ghjennaghju in Fresne (Val-de-Marne), Elena, 50 anni hè stata tomba da u so maritu di 33 anni in u campeghju induv’elli stàvanu. Hà incesu un incèndiu dopu per piattà u so crìmine, brusgiendu à tempu a metà di u campeghju è mettendu in perìculu e 175 personi chì ci stàvanu.
Dumènica u 22 di ghjennaghju in Pont-Péan (Ile-et-Vilaine), Catherine, 46 anni, hè stata strangulata da u so maritu di 36 anni in casa soia. Ghjè ellu ch’hà prevenutu i gendarmi, diciendu ch’ellu l’avìa truvata cusì. Secondu à a gendarmarìa, a curciaccia avìa traccie di colpi un pocu dapertuttu.
U 22 di ghjennaghju torna, in Saint-Brieuc (Côtes d’Armor), Angélique, 22 anni, hè stata tomba in casa d’un colpu di fucile da u so cumpagnu di 24 anni. U tippu hà tombu dinù à ciuccia di Angélique, Eva, 3 anni, è gravamente ferita a sòcera. S’hè tombu dopu di stessa manera.
Ghjovi u 19 di ghjennaghju, in Parigi (13u circundariu), Catherine, 46 anni, hè stata avvelenata à u mercuriu da u so cumpagnu ch’ùn suppurtava micca à so ruttura.
Una simana nanzu, l’8 di ghjennaghju, hè Valérie ch’hè stata scannata in casa soia in Arques (Pas-de-Calais) da u so cumpagnu d’una cinquantina d’anni. Avìa a corcia 52 anni. Ellu hè scappatu dopu è a salma ùn hè stata ritruvata chè u 12 di ghjennaghju. A pulizza l’hà arrestatu u 15 di ghjennaghju.
Eccu, sò digià 12 donne assassinate in 2023… 12 di troppu. •