Sò esciuti issi pochi mesi dui libri chì tràttanu di a ghjustizia, è più precisamente di i so scarti. In sti tempi
bughjosi, cù una ghjustizia chì si ne piglia di manera spripusitata à a nostra ghjuventù, cù un guvernu chì cerca à cuntrappònesi à una maiurità naziunalista chì, malgratu e predizzioni, riesce à fà avanzà a Còrsica, si ne more a ghjustizia.
U primu libru hè Sous le feu corse da Patrice Camberou è François Pottier, cù dissegni di Daniel Blancou. Si tratta d’un fumettu chì mette à palesu l’affare dettu « des paillotes ». T’averemu dunque quì u puntu di vista di a ghjustizia : u ghjòvanu ghjùdice d’istruzzione di l’èpica, Patrice Camberou, si cunfessa à u ghjurnalistu François Pottier. Di fatti, à trent’anni, un ghjornu ch’ellu era di permanenza, Camberou chjappa un’affare di prima trinca : ind’a notte di u 19 aprile 1999, piccia a paillote «Chez Francis », accant’à Aiacciu. Guasgi sùbitu, s’accatàstanu e prove contr’à i gendarmi di u G.P.S., u «Groupement de Peloton de Sécurité », natu di 1998, dopu à l’assassiniu di u prefettu Erignac. T’hà trè missioni : sustene l’interpellazione, pruttegge i capizzoni di u Statu, eppò surveglià. U ghjòvannu ghjùdice d’istruzzione dumanda l’aiutu di dui culleghi da scioglie u più prestu pussìbile un affare chì tocca direttamente à u Statu : hè chjaru chì i militari avianu ricevutu l’òrdine di brusgià a paillote. St’affare si compierà cù a messa in esàmine è a cundanna d’un prefettu di a Repùblica !
Stu libru ci permette di scopre a manera di travaglià di a ghjustizzia. E màghjine ramèntanu i dissegni fatti in tribunale. U fattu si stà chì, in Francia, i ghjurnalisti ùn ponu micca filmà o piglià ritratti di u prucessu. Sò dunque illustratori chì rèndenu contu di ciò chì si passa, u sicondu pianu spariscendu daretu à a faccia di i prutagunisti. Hè listess’affare quì : i parsunaghji sò precisi, ma smarisce u daretu.
U sicondu libru ùn tratta micca di a Còrsica ma hè dedicatu à Vincent Stagnara, è mette à palesu e sviate di a ghjustizia. Eric Dupont-Moretti è Stéphane Durand-Souffland, in Directs du Droit, ci còntanu affari chì u ghjudiziu dipende di a qualità di u Presidente è di u Pricuratore. Ci vole à mette da cantu a murale è avè appenna sennu : hè accadutu di fà testimunià un cane, o di fà a perizia psichiàtrica d’un mortu ! Eric Dupont-Moretti, in pìcculi capìtuli, ci face capisce u perìculu d’una ghjustizia chì a pena hè ghjudicata nanzu è chì i magistrati si danu di rimenu per cunvince i ghjurati di vutà cum’elli vòlenu. Eccu dui libri chì palèsanu chì a malizia vene, ogni tantu, da a ghjustizia stessa, è micca sempre da l’avucati di a difesa.
Marina Chovin